Qindra dosje i ka zënë pluhuri në SPAK, pse Kraja dhe Millonai nxituan të hapnin çështjen për privatizimin?

‘Privatizimi i klubit Partizani (1) ishte tjetërsim i paligjshëm i pronës shtetërore (2) toka ishte shpronësuar nga Italia dhe se (3) privatizimi ishte i paligjshëm’, këto ishin akuzat që Taulant Balla, i adresoi pranë SPAK-ut në 2020 në lidhje me privatizimin e klubit Partizani duke u munduar t'ja faturojë kryedemokratit Sali Berisha dhe dhëndrit të tij Jamarbër Malltezi.

“Me datë 24.11.2020 shtetasi Taulant Balla ka paraqitur pranë SPAK, kallëzim penal ndaj kundër shtetasve Sali Berisha, disa ish ministrave në qeverinë e PD, si dhe personave jo – zyrtarë Jamarbër Malltezi, F.B dhe Xh.B, në lidhje me privatizimin e klubit Partizani.

Në kallëzimin e tij, Taulant Balla pretendon se privatizimi i klubit Partizani (1) ishte tjetërsim te paligjshëm te pronës shtetërore (2) se toka ishte shpronësuar nga Italia dhe se (3) privatizimi ishte i paligjshëm”.

Por habia më e madhe nuk qëndron këtu. Sipas padisë së Malltezit ndaj Ballës në gusht të këtij viti, brenda 1 jave nga kallëzimi i Ballës, më 01.12.2020, prokurorët e SPAK, Arben Kraja dhe Enkeleida Millonai, nisën procedimin penal në lidhje me privatizimin e klubit Partizani.

Dhe është thuajse një javë  koha që Krajës e Millonait iu desh për të hapur çështjen për privatizimin duke thyer çdo rekord.

Kjo për faktin se në SPAK ka me qindra dosje dhe padi të cilat janë pluhurosur dhe nuk ka filluar procedimi.

Ndaj rrjedhimisht lind pyetja: Pse ky nxitim në këtë rast?

SPAK “harron” Ramën

Në dosjen e SPAK-ut përmendet shkarazi se “me vendimin nr. 132, dt. 08.06.2006 të Kryetarit të Këshillit të Rregullimit të Territorit, Bashkia Tiranë, u vendos që të ndryshojë destinacioni, duke e kthyer në zonë banimi”, territorin që i përkiste klubit sportiv “Partizani”.

Sipas SPAK-ut, ky vendim i Bashkisë së Tiranës binte në kundërshtim me legjislacionin në fuqi, i cili nuk lejonte tjetërsimin e terreneve sportive. Megjithatë, ai vendim u mor.

Por, prokurorja Millonai, nuk përmend faktin se kryetari i KRRT-së së Bashkisë së Tiranës në atë kohë, ishte Edi Rama, kryeministri aktual.

Firma e Ramës e shndërroi terrenin sportiv në truall për godina banimi. Por, as në këtë moment dhe as në të gjithë materialin hetimor, prokurorja nuk e përmend asnjëherë Ramën.