Rrëfimi i pazakontë i Ylli Rakipit: Brezi im ka kaluar sfida të jashtëzakonshme

Gazetari i njohur Ylli Rakipi ka ndarë një rrëfim të sinqertë në Elevate by Floriana Garo, mbi karrierën dhe filozofinë e tij në ekran, duke theksuar se suksesi lidhet drejtpërdrejt me përkushtimin maksimal ndaj punës.

Sipas tij, nëse nuk i jepet i gjithi emisionit, atëherë ai nuk e konsideron veten fitimtar, duke e vënë këtë qasje në kontrast me ata që shfaqen në ekran për të promovuar veten dhe jo përmbajtjen.

I pyetur mbi “të qenit i vërtetë”, Rakipi shprehet me modesti se nuk i takon atij ta përcaktojë këtë cilësi.

Në një botë që ai e përshkruan si “të mbushur me mitomanë dhe narcisizëm të pafrenë”, ku secili pretendon se është më i vërteti, ai beson se gjykimi i takon publikut.

“Duhet ta thonë ata që më ndjekin dhe më shikojnë,” pohon ai.

Pjese nga intervista

Ylli Rakipi: Nuk di… s’duhet ta them unë këtë. Sepse çdo njeri që të pyesësh sot, sidomos në këtë botë ku jetojmë, të mbushur me mitomanë dhe me një narcisizëm të pafrenë, të gjithë mendojnë se janë më të vërtetët. Nuk di ta them. Duhet ta thonë ata që më ndjekin dhe më shikojnë.
Është një gjë pozitive që, për shembull, shumë të rinj më thonë: “E pamë emisionin…”. Unë përpiqem t’i jepem i gjithi emisionit. Dhe nëse i jepem i gjithi, atëherë kam fituar edhe unë. Sepse unë jam ai që e bëj. Shumë të tjerë bëjnë të kundërtën: dalin dhe shfaqen vetë, duke harruar emisionin.

Garo: E vërtetë.

Ylli Rakipi: Sa i vërtetë jam, nuk di ta them plotësisht. Të tjerët duhet ta thonë.

Garo: E ke pasur si qëllim këtë, teksa je formuar? Ka qenë një nga parimet e tua?

Ylli Rakipi: Të qenit i vërtetë?

Garo: Po.

Ylli Rakipi: Sipas meje është diçka totalisht subjektive. Edhe e kam vuajtur këtë, duke u përpjekur të them atë që është e vërtetë. E vërteta, siç thotë Karl Popper, nuk është një.

Garo: Po.

Ylli Rakipi: Ka të vërtetën time, tënden, të tjetrit.

Garo: Por ka edhe një të vërtetë universale…

Ylli Rakipi: Absolute nuk ka. Ka disa të vërteta. Dhe në këtë kuptim, po të them unë që jam i vërtetë, është vetëm sipas meje.

Garo: (Qesh) Po parimet që ke ruajtur gjatë kësaj karriere të gjatë?

Ylli Rakipi: Ti po flet për parime, por jeta ime është ndarë në dy pjesë, në dy kohë. Parimet kanë qenë të njëjta: përpjekja për të bërë diçka, për të qenë dikush, me mundësitë që ke. Duhet edhe prirje, edhe talent. Besoj se e kam pasur dhe jam përpjekur ta zhvilloj. Sa ia kam arritur, nuk di ta them.
Unë kam jetuar në dy kohë, si shumëkush në këtë vend. Dhe ata që kanë kaluar në dy sisteme, kanë pasur sfida të jashtëzakonshme…