Shkullaku: Rama po ushtron dhunë publike ndaj shoqërisë, Durrësi është shembulli më i qartë

 
Gazetari Armand Shkullaku komentoi deklaratat e kryeministrit Edi Rama sot nga Durrësi.

I ftuar në Syri tv, ai tha se ajo që po ndodh në Durrës përfaqëson një dhunim publik ndaj shoqërisë shqiptare.

Shkullaku u ndal te përfaqësimi politik në qytetin bregdetar, fenomeni “Ergys Agasi” dhe degradimi, sipas tij, i standardeve politike dhe demokratike në vend.

Ai kritikoi edhe mënyrën se si funksionon opozita dhe sistemin politik në Shqipëri, duke theksuar se problemi kryesor mbetet mungesa e një demokracie reale dhe përfaqësimit qytetar.

"Tani të them edhe këtë çështjen e qëndrimit që preket nga mediat dhe nga opozita. Ajo që shikojmë në Durrës është një dhunim publik që Edi Rama i bën shoqërisë.

Tani, nëse bëjmë një krahasim dhe shohim se ku vendoset vëmendja, këtu vjen ai prioriteti i ‘projektorëve’ tanë, ku drejtohen. Çfarë ndodhi në atë sallë? Bardh Agasi… vijnë socialistët e vjetër, dhe kur i sheh, duken të hutuar, si njerëz që nuk dinë ku të drejtohen. Ajo që u tha aty ishte e paqartë dhe pa lidhje.

Nuk është kjo ngjarja kryesore. Ngjarja është se si figura si Bardh Agasi janë pjesë e një realiteti më të gjerë të socialistëve, të vjetër dhe të rinj, që shpesh nuk kuptojnë se çfarë po ndodh rreth tyre.

Ajo që ndodh aty është një dhunim publik për disa arsye.

Së pari, sepse Bardh Agasi është babai i Ergys Agasit, por kjo nuk ka lidhje me përgjegjësi individuale, sepse askush nuk mban përgjegjësi për familjarët. Por fenomeni ‘Ergys Agasi’ është simbol i mënyrës se si Edi Rama ka ndikuar në Durrës.

Nga historia, kultura dhe përfaqësimi politik që ka pasur Durrësi më parë, deri te ajo që përfaqëson sot, ka një ndryshim të madh. Nëse shikon emrat që kanë përfaqësuar Durrësin më parë dhe ata që e përfaqësojnë sot, dallimi është i dukshëm.

Nëse Edi Rama do të mendonte për socialistët dhe për qytetin e Durrësit, do të duhej të kishte një reflektim më të thellë për përfaqësimin politik atje.

Deputetët që kanë përfaqësuar Durrësin ndër vite përfshijnë raste të ndryshme, disa në burg, disa në hetim, disa anonimë, dhe të tjerë të përfshirë në skandale të ndryshme. Kjo tregon një problem të thellë në përfaqësim.

Ajo që ndodh nuk është thjesht çështje fjalori apo sjelljeje në një sallë, por mënyra se si njerëzit detyrohen të pranojnë realitetin politik pa kundërshtim dhe pa zë kritik.

Në anën tjetër, edhe opozita ka problemet e saj. Ajo është përfshirë në një proces politik ku janë vendosur kushte të pabarabarta, ku i është vështirësuar funksionimi normal, me mungesë fondesh dhe mekanizmash të barabartë zgjedhorë.

Ky është një tjetër problem për demokracinë dhe pluralizmin në Shqipëri.

Madje, pavarësisht se kush mund të jetë kryetar i Partisë Demokratike në të ardhmen, do të vazhdojnë të ketë sulme dhe akuza të ngjashme personale dhe politike ndaj çdo figure.

Detyra jonë si media është të identifikojmë rreziqet kryesore për shoqërinë, për lirinë dhe për përfaqësimin qytetar.

Demokracia është përfaqësimi i qytetarëve në Kuvend, por sot Kuvendi është në një gjendje të rënduar.

Ka pasur raste të baltosjes dhe degradimit të figurave politike dhe publike, të cilat më pas trajtohen ndryshe sipas pozicionit të tyre politik.

Prandaj, pyetja kryesore është se ku e vendosim fokusin: tek problemi më i madh që ndikon shoqërinë, apo tek çështje të brendshme të partive politike.

Nëse do të kishim një demokraci funksionale, gara në Partinë Demokratike do të ishte një çështje e rëndësishme. Por në kushtet aktuale, problemi është më i gjerë.

Edhe mënyra se si organizohet opozita ka shumë probleme dhe mund të kishte zgjidhje më të strukturuara, si një front i përbashkët opozitar.

Por pavarësisht këtyre, fokusi nuk duhet të largohet nga problemi kryesor që perceptohet si më i madhi për shoqërinë.

Prandaj është e rëndësishme të bëhet dallimi mes dy skenave dhe dy realiteteve politike.’, tha gazetari Armand Shkullaku.