Skandali me pagat dhe mosreagimi ndaj kërcënimit të prokurorëve, kush është Arben Kraja, i cili firmosi urdhrin për ndalimin e Malltezit?

Prokurori i Posaçëm, Arben Kraja, ka qenë ai i cili ka firmosur urdhrin për ndalimin e Jamarbër Malltezit këtë të shtunë.

Me urdhër nga SPAK, policia ka ndaluar mbrëmjen e sotme edhe biznesmenin Fatmir Bektashi, ndërtuesin i cili ka ngritur pallatet tek ish-kompleksit Partizani.

Po kush është Arben Kraja?

Arben Kraja ka qenë në krye të SPAK-ut për disa kohë, nisur ne vitin 2019. Teksa ka raportuar në Këshillin e Lartë të Prokurorisë kohë më parë, Kraja është pyetur edhe për punën e tij si drejtues.

Ai ka vlerësuar vetën me notat më të larta të mundshme, duke  thënë se “kam punuar me vullnet, ligjshmëri, përgjegjshmëri e transparencë. Pjesën tjetër e vlerësojnë të tjerët”, ka thënë Kraja.

Ndërsa lidhur me efektivitetin e SPAK-ut, për shkak të pritshmërive të shumta që ka pasur opinion publik, Kraja ka  pranuar se ka pasur probleme.

“SPAK-u është strukturë e ngritur nga e para dhe normalisht do ketë probleme, ndryshe nga BKH që i gjeti të gjitha gati. Rezultatet kanë ardhur, ka edhe shumë punë, do bëhet shumë punë”, është shprehur Kraja në KLP.

SKANDALI ME PAGAT (Dec 22, 2021)

Shpërndarja e një liste të dhënash të 630 mijë qytetarëve shqiptarë të punësuar në sektorin privat dhe shtetëror në vend ka ngritur një kuriozitet të madh edhe për emra të njohur, qofshin këto edhe në institucione shtetërore apo pushtetin gjyqësor dhe sistemin e drejtësisë.

Në listë nuk mungonin as pagat e inspektorëve të shërbimit informativ, të ushtrisë, policisë dhe agjentëve të saj.

Databasen e kryeson me pagën më të lartë drejtuesi i Prokurorisë së Posaçme, Arben Kraja i cili ndiqej nga Altin Dumani., aktualisht me postin kreu i SPAK.

Prokurorë të SPAK

Arben Kraja 593,978.00

Altin Dumani 541,489.00

Kush po i kërcënon prokurorët e SPAK-ut, pse Arben Kraja nuk flet? (25 NËNTOR 2022)

Kreu i SPAK, Arben Kraja, u shpreh në një intervistë për "Euroneës Albania" se prokurorët e SPAK-ut punojnë në një terren shumë të vështirë, pasi hetojnë krimin e organizuar, terrorizmin dhe zyrtarët e lartë.

Nga ana tjetër Kraja nuk ka folur se kush po i kërcënon dhe nga vijnë këto kërcënime.

 “Nuk është vetëm SHBA-ja me të cilët ne bashkëpunojmë, bashkëpunojmë edhe me BE-në, me shtete të veçanta në rajon, bashkëpunojmë me Mbretërinë e Bashkuar. Është e dukshme që SHBA janë një nga faktorët kryesorë që kanë ndikuar në realizimin e reformës, në përcaktimin e strukturave të reja që do krijohen dhe janë faktorët kryesorë që kanë mbështetur SPAK në ngritjen e tij në këto 3 vite. Na kanë mbështetur edhe nga pikëpamja financiare dhe këshillave të vazhdueshme. Ne kemi në SPAK përfaqësues të DEA-s, të departamentit të drejtësisë, ashtu siç kemi kontakte të ngushta me strukturat europiane. Nuk ka asnjë aspekt për t’u çuditur për bashkëpunimin me autoritetet e huaja. Deklaratat e ambasadores, unë nuk kam asnjë autorizim t’i komentoj dhe ajo e di pse i ka bërë.

Prokurorët e SPAK-ut patjetër që veprojnë në një terren të vështirë sepse hetojnë krimin e organizuar, terrorizimin, hetojnë korrupsionin, zyrtarët e lartë. Të gjithë këta elementë kanë situata të vështira për t’u hetuar dhe provuar fajësia. Krimi i organizuar ka specifikë tjetër, zyrtarët e lartë kanë specifikë tjetër”, ka thënë Kraja.