Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

Të mërkurën mbërrin në Shëngjin anija me 100 emigrantë nga Italia

Politiko 8 Prill 2025, 18:09

Të mërkurën mbërrin në Shëngjin anija me 100
Të mërkurën pritet të mbërrijë në Portin e Shëngjinit anija e radhës me rreth 100 emigrantë të dëbuar nga Italia, të cilët do të vendosen në kampin e Gjadrit. Kjo është hera e tretë që emigrantë të tillë transferohen në Shqipëri, në kuadër të marrëveshjes së firmosur mes kryeministres italiane Giorgia Meloni dhe kryeministrit shqiptar Edi Rama në vitin 2023.

Ndryshe nga fillimi i projektit, ku qendrat në Shëngjin dhe Gjadër u parashikuan për të strehuar emigrantë në pritje të azilit, qeveria italiane ka ndryshuar qëllimin e tyre. Sipas një deklarate të fundit të ministrit të Brendshëm italian, Matteo Piantedosi, emigrantët që do dërgohen në Shqipëri do të jenë persona të dëbuar, të cilët nuk përfitojnë të drejtën e qëndrimit në Itali.

Në një intervistë të dhënë më 25 mars 2025, Piantedosi bëri të ditur se objektivi i ri është që këto struktura të shndërrohen në Qendra të Paraburgimit të Riatdhesimit (CPR), me kohë qëndrimi deri në 18 muaj. Sipas tij, kjo politikë do të forcojë procesin e kthimit të emigrantëve të parregullt në vendet e tyre të origjinës.

Pavarësisht përpjekjeve për ta zbatuar marrëveshjen, projektit nuk i kanë munguar pengesat ligjore. Në tetor dhe nëntor të vitit të kaluar, gjykatat italiane ndaluan transferimin e azilkërkuesve në Shqipëri për shkak të pasigurisë në lidhje me vendet e origjinës dhe mungesës së një liste të unifikuar të shteteve të sigurta brenda BE-së. Megjithatë, më 30 dhjetor 2024, Gjykata e Kasacionit në Itali i dha të drejtë qeverisë Meloni, duke konfirmuar se vlerësimi i vendeve të sigurta apo të pasigurta mbetet kompetencë ekskluzive e Ministrisë së Jashtme dhe kabinetit qeveritar.

Ndërkohë, marrëveshja vijon të jetë objekt debati në opinionin publik. Opozita italiane e ka cilësuar projektin të kushtueshëm dhe jopraktik, duke theksuar se 800 milionë euro për 5 vite janë një kosto e pajustifikueshme për një numër të kufizuar personash, ndërsa organizatat ndërkombëtare të të drejtave të njeriut e kanë kritikuar si një përpjekje për të zhvendosur barrën e krizës së emigrantëve në vende me sistem më të dobët ligjor dhe ekonomik.

Megjithatë, Komisioni Evropian dhe disa liderë të BE-së kanë shprehur interes për këtë model, duke e konsideruar një mundësi për menaxhimin e emigracionit jashtë kufijve të Bashkimit Evropian.