Flash News

Sherr në varrezat e Durrësit, plagosen babë e bir

Aksidentohet për vdekje një grua në Tapizë, pranga shoferit 33-vjeçar

Mbrëmë i shpëtoi atentatit/ Kush është Katerina Beqo, gruaja që ishte në makinë me djalin e vogël kur i ekzekutuan burrin (Ngjarja)

Dyshohet se u përdor në vrasjen e Gjovalin Prendit, gjendet i djegur një automjet në Fushë Gjormë

“Shqipëria s’e mbajti dot”, Lara Colturi zgjedh Italinë për karrierën

E-TJERA

Belgjika godet sërish “Black Eagle”/ Shqiptari përballet me kërkesë për dënim shtesë

Politiko 16 Prill 2025, 17:53

Belgjika godet sërish “Black Eagle”/ Shqiptari përballet

Prokuroria belge ka kërkuar të martën një dënim shtesë prej 6 vitesh burg për shtetasin shqiptar Klodjan B., një nga 34 të pandehurit në çështjen e bujshme ndërkombëtare “Black Eagle”, që ka tronditur rrjetet e trafikut të kokainës në Europë.

Klodjan B. është dënuar më parë në Holandë me 30 muaj burg me kusht, për veprime të ngjashme në të njëjtën periudhë, 2018-2022. Por sipas prokurorisë belge, roli i tij ka qenë shumë më i thellë, përtej transportit të drogës.

Në prill të vitit 2021, ai u arrestua në automjetin e tij, ku iu gjetën tetë kilogramë kokainë. Gjurmimi i komunikimeve të tij, si dhe pamjet e sekuestruara nga celulari, zbuluan të dhëna të forta që sugjerojnë përfshirjen e tij edhe në përgatitjen e lëndës narkotike, si dhe në funksione të tjera të zinxhirit të trafikut.

Prokurori belg theksoi se në telefonin e tij janë gjetur fotografi me kostume zhytjeje, që lidhen me teknikat e përdorura nga “nxjerrësit” — persona që rikuperojnë drogën nga trupat e anijeve në port. Ky element, i ndërlidhur me të dhëna nga dosja “Sky ECC”, shton dyshimet për rolin aktiv dhe të sofistikuar të Klodjan B. në këtë rrjet kriminal.

Nga ana tjetër, mbrojtja ka kërkuar zbatimin e parimit “non bis in idem”, që ndalon gjykimin e një personi dy herë për të njëjtat fakte. Megjithatë, prokuroria belge argumenton se dënimi në Holandë nuk reflekton seriozitetin dhe përmasën reale të përfshirjes së tij, ndaj kërkon një tjetër vendim dënues.

Gjykata pritet të vendosë jo vetëm mbi këtë çështje ligjore, por edhe mbi rolin konkret të Klodjan B. në një nga organizatat më të mëdha kriminale me origjinë shqiptare në trafikun ndërkombëtar të kokainës.

Në këtë dosje voluminoze, përveç Klodjan B., janë përfshirë edhe emra të tjerë të njohur si Artur S., Indrit Kulaj, Arben I., Alfredo dhe Arten Hamzai, Fjodor B., Aldo T., Llazar S., Marsel A., Geron Z. dhe Bashkim O. (nga Kosova) — të cilët, sipas mediave belge, përbëjnë bërthamën e një rrjeti të sofistikuar dhe të dhunshëm shqiptar të kokainës në Europë.

Gjithashtu, në dosje janë përmendur lidhje me zyrtarë të korruptuar në Shqipëri, përfshirë raste të ryshfetit me një orë luksoze në vlerën e 400 mijë eurove dhe takime në Antilet Hollandeze për të siguruar leje ndërtimi për një kullë në Tiranë.