Video-skandal në qelinë e burgut të sigurisë së lartë: Lul Berisha me “bandën” festojnë me alkool e drogë

Pamjet që po dalin nga një burg i sigurisë së lartë janë tronditëse dhe flasin vetë: qelitë nuk duken si burg, por si dhoma feste për të fortët.

Në video shfaqet Lulzim Berisha së bashku me disa persona të tjerë, të ulur në një ambient të përbashkët, duke pirë alkool, duke përdorur disa telefona njëkohësisht dhe duke bërë video-call me persona jashtë. Muzikë, të qeshura dhe lëvizje të lirshme nga një qeli në tjetrën, pa asnjë shenjë kontrolli.

Në të njëjtat pamje, sipas diskutimeve në studio, pretendohet se shfaqen edhe emra të njohur si Fehmi Mziu, si dhe persona të përmendur si Astrit Avdulaj “Kapelja”, Islam Kasa “Mitralozi” dhe të besuar të Kel Arapit. Identitetet mbeten për t’u verifikuar nga autoritetet, por pamjet kanë ngritur dyshime të forta.

Gazetari Artan Hoxha e cilësoi videon si një tregues të qartë të mënyrës si funksionon sistemi në burgje, duke theksuar se kush ka para, siguron kushte dhe privilegje edhe brenda qelisë.

Sipas tij, gjithçka ka një çmim: telefonat futen me pagesë, alkooli sigurohet me lekë, ndërsa ‘malli’ hyn përmes rrugëve të paligjshme dhe shpesh me çmime më të larta se jashtë.

Lëvizja nga një qeli në tjetrën nuk ndodh rastësisht, por përmes marrëveshjeve dhe favoreve.

Flamur Vezaj theksoi se video dyshohet të jetë filmuar në burgun e Peqinit dhe është mbajtur për një periudhë për verifikim para publikimit.

Sipas tij, pamjet tregojnë qartë se dera e qelisë duket e hapur, ka disa telefona në përdorim dhe një situatë që nuk përputhet me rregullat e një burgu të sigurisë së lartë.

Sipas Hoxhës, kjo video mjafton për të nisur një hetim të plotë për të kuptuar se si kanë hyrë sendet e ndaluara, kush i ka lejuar dhe kush përfiton nga kjo situatë, pasi pa bashkëpunim nga brenda kjo është e pamundur.

Ai shtoi se pamje të tilla rrëzojnë çdo deklaratë për siguri dhe kontroll në burgje, duke treguar një realitet paralel ku disa të dënuar blejnë kushte dhe ndikim.

Ky skandal ka ngritur pikëpyetje serioze mbi funksionimin e institucioneve të vuajtjes së dënimit dhe nivelin e korrupsionit brenda tyre, ndërsa mbetet për t’u parë nëse autoritetet do të reagojnë dhe do të nisin hetime për zbardhjen e plotë të rastit.

Marrë nga Mashqip.com