Pas takimit me kryeministrin e Shqipërisë ditën e djeshme, Presidenti i Kosovës, Hashim Thaçi deklaroi se kishin biseduar për domosdoshmërinë në lidhje me hapjen e plotë të kufirit me Shqipërinë dhe krijimin e një hapësire shqiptare pa kufi nën ombrellën e aleancën euroatlantike. Për diplomatin Agim Nesho, kjo është nje ide e rrezikshme që nuk lejohet as nga e drejta ndërkombëtare dhe e dëmshme për momentin.
“Unë mendoj që është një retorikë që i shërben më tej atij patriotizmit shqiptar dhe vlerësimit ndaj asaj që ka ndodhur në Berlin. Unë mendoj që Berlini ka qenë shumë i prerë dhe i saktë duke thënë që “doni të vini në familjen tonë evropiane, këto janë konditat. Asnjë fuqi tjetër mund të përcaktojë rregullat e shtëpisë tonë”. Çfarë do përpjekjesh të bëjnë udhëheqësit lokalë me prioritet që kanë duke thirrur një forcë ose një forcë tjetër, kjo gjë i takon Europës dhe në një kuptim kjo gjë do të zgjidhet në Europë dhe sipas kushteve të Europës.
Kjo është një aventurë sepse nuk e lejon ligji ndërkombëtar, sepse jo vetëm Kosova, e cila me këtë deklaratë prek Kushtetutën e saj edhe vë në rrezik atë që komuniteti ndërkombëtar i ka përcaktuar, nuk ka bashkim me vende të tjera, nuk ka sovranitet ndaj Serbisë më. Përmendja e zonave të ndryshme në territorin e Serbisë, ashtu si edhe një ide tjetër për heqjen e kufijve, sado patriotike të jetë, është e dëmshme për këto momente, për Kosovën sepse ka të bëjë me procesin e njohjeve dhe aderimin në OKB”, deklaroi Nesho në emisionin ‘Mbrëmje Ide’ me Mirela Milorin.
Financuar Nga Bashkimi Europian
