Muaji maj ishte periudha kur shqiptarët po rinisnin normalitetin, por mes kufizimesh që nisën të hiqeshin deri në 1 qershor në mënyrë graduale.
Veç asaj të fundit, fundjavat në maj ishin të mbyllura, lëvizjet kontrolloheshin ende me fasha orare për grupmosha të caktuara dhe disa lloje biznesesh po ashtu ishin jo aktive.
Megjithatë, për deputetët e Kuvendit nuk ka patur rëndësi një fakt i tillë, pasi në listën mbi përfitimet financiare gjatë majit rezulton se disa prej tyre kanë patur shpenzime deri në 75 mijë lekë dieta dhe 40 mijë lekë të reja karburant.
Madje, kujtojmë se deri në fund të punimeve, Komisionet Parlamentare janë zhvilluar online, kurse Tirana ishte ende një zonë e kuqe, pra nuk lejohej lëvizja e banorëve kryeqytetas në qytetet të tjera veç atyre të autorizuar.
Deputetët që morën më shumë dieta (75 mijë lekë) për udhëtime brenda vendit janë: Antoneta Dhima, Andrea Marto, Bujar Cela, Luan Dusha, Elena Xhina, Edlira Hyseni, Edlira Braha, Arben Elezi, Ambra Barova, Arlind Carcani, Halil Jakimi, Nikolin Staka, Selami Jenisheri, Kostaq Papa, Artemis Dralo, Ervis Meco etj., ndërsa Nimet Musai shënon shifrën më të lartë me 79 mijë lekë.
Mes deputetëve që nuk kanë përfituar para për dieta renditen Besnik Baraj, Ervin Bushati, Fidel Ylli, Gramoz Ruci, Vasilika Hysi, Tom Doshi etj.
Ndërkohë, sa i përket rimbursimit për karburant kanë përfituar të gjithë deputetët nga 30-40 mijë lekë veç Ruçit, Vasilika Hysit dhe Myslim Murrizit.
Financuar Nga Bashkimi Europian
