Foto/ Në shkelje të Kodit Zgjedhor, posterat e PS shfaqen në QV në Tiranë

Edhe pse sot është heshtje zgjedhore dhe fushata e partive politike është e ndaluar, posterat me numrin 5 të Partisë Socialiste mbeten prezente në disa ambiente të qendrave të votimit.

Kjo foto vjen nga Njësia nr. 5 në Tiranë ku shfaqen vizatime të bëra në kuadër të Ditës së Evropës më 9 Maj, por pa shmangur edhe një mesazh elektoral pro Partisë Socialiste.

Pëllëmba e vizatuar në poster, numri 5 i PS në fletën e votimit, është ende në qendrën e votimit, edhe pse duhej të ishin marrë masa për t’u hequr.

Prania e mesazheve elektorale në qendrat e votimit (ose në një rreze të caktuar përreth tyre) pak orë para ose gjatë ditës së zgjedhjeve përbën shkelje të Kodit Zgjedhor të Republikës së Shqipërisë.

Sipas nenit 77 të Kodit Zgjedhor, është e ndaluar çdo formë fushate elektorale në ditën e zgjedhjeve dhe një ditë para saj. Ky ndalim përfshin:

• Vendosjen e materialeve promovuese (postera, pankarta, flamuj partie, slogane etj.) në ose pranë qendrave të votimit.

• Mesazhe të shkruara apo audio-vizuale që mund të ndikojnë tek votuesit.

• Veprime që mund të konsiderohen si fushatë elektorale në mënyrë të drejtpërdrejtë ose të tërthortë.

Zakonisht, Komisioni Qendror i Zgjedhjeve (KQZ) urdhëron largimin e çdo materiali promovues në një rreze 150 metra nga çdo qendër votimi, përpara fillimit të procesit të votimit. Por, duket se KQZ-së i kanë shpëtuar këto postera me një mesazh të qartë elektoral.

 

Nesër shqiptarët do t’i drejtohen kutive të votimit për të votuar për qeverinë e re dhe kryeministrin e ri të vendit.