Hantavirusi “troket” pranë Shqipërisë? Si ndodh infektimi dhe shenjat e para

OBSH konfirmon rastet, rreziku global mbetet i ulët

Organizata Botërore e Shëndetësisë ka konfirmuar gjashtë raste me hantavirus nga tetë të dyshuara pas shpërthimit të infeksionit në anijen turistike holandeze MV Hondius, ku të paktën tre persona kanë humbur jetën.

Sipas të dhënave paraprake, të gjithë të infektuarit rezultojnë të kenë variantin Andes, i vetmi lloj hantavirusi që në raste të rralla mund të transmetohet nga njeriu te njeriu. Me gjashtë raste të konfirmuara dhe tre viktima, shkalla e vdekshmërisë arrin në rreth 38%.

Megjithatë, OBSH thekson se rreziku për popullsinë globale mbetet i ulët dhe situata po monitorohet vazhdimisht.

Protesta dhe masa sigurie në Tenerife

Anija turistike ndodhet pranë Tenerife, ndërsa banorët vendas kanë reaguar me shqetësim dhe protesta kundër zbarkimit të pasagjerëve.

Autoritetet spanjolle kanë bërë të ditur se anija nuk do të ankorohet drejtpërdrejt në portin e Tenerifeve, por në det të hapur. Pasagjerët do të transportohen me tragete drejt portit industrial të Granadillës, larg zonave të banuara.

Sipas qeverisë spanjolle, nuk do të ketë asnjë kontakt mes pasagjerëve dhe banorëve lokalë. Pas mbërritjes, shumica e udhëtarëve do të riatdhesohen, ndërsa 14 shtetas spanjollë do të transferohen në Madrid për karantinë.

Ekspertët: Nuk ka rrezik për pandemi

Ekspertët ndërkombëtarë dhe epidemiologët theksojnë se situata nuk paraqet rrezik për një pandemi të re.

Gikas Mayorkinis, profesor i Higjienës dhe Epidemiologjisë në Universitetin Kombëtar të Athinës, deklaroi se transmetimi i virusit mes njerëzve është “jashtëzakonisht i kufizuar” dhe kërkon kontakt shumë të afërt dhe të zgjatur.

Sipas tij, nuk ka tregues që virusi po bëhet më i transmetueshëm jashtë mjedisit specifik ku u regjistruan rastet.

Edhe Qendra Evropiane për Parandalimin dhe Kontrollin e Sëmundjeve vlerëson se rreziku për publikun në Evropë mbetet shumë i ulët.

Çfarë është hantavirusi?

Hantaviruset transmetohen kryesisht nga brejtësit e infektuar përmes urinës, jashtëqitjeve apo grimcave të kontaminuara në ajër.

Në Amerikën e Jugut qarkullojnë variantet e njohura si “viruset e Botës së Re”, përfshirë virusin Andes, i cili lidhet me forma më të rënda respiratore dhe shkallë më të lartë vdekshmërie.

Ndërsa në Evropë, format e hantavirusit konsiderohen më të lehta dhe nuk është dokumentuar transmetim nga njeriu te njeriu.

Simptomat zakonisht shfaqen nga një deri në tetë javë pas ekspozimit dhe përfshijnë:

• temperaturë dhe ethe,

• lodhje të fortë,

• dhimbje muskulore,

• probleme respiratore,

• në raste të rënda, dëmtime të veshkave dhe sistemit kardiopulmonar.

                                                                                                          Aktualisht nuk ekziston vaksinë apo trajtim specifik për hantavirusin dhe trajtimi mbetet mbështetës.

Alarm edhe në Itali, katër persona nën mbikëqyrje

Italia ka aktivizuar procedura të posaçme mbikëqyrjeje për katër pasagjerë që ranë në kontakt me një grua të infektuar, e cila më pas humbi jetën në Johannesburg.

Sipas Ministrisë italiane të Shëndetësisë, kontaktet janë identifikuar në rajonet e Kalabrisë, Kampanias, Toskanës dhe Venetos.

Në Firence, një grua është vendosur në karantinë parandaluese, ndërsa autoritetet lokale theksojnë se kontakti me viktimën nuk ka qenë i afërt apo i zgjatur.

Autoritetet italiane kanë bërë të ditur se masat janë marrë në kuadër të “kujdesit maksimal”, ndërsa vlerësimet aktuale të OBSH dhe ECDC vijojnë të tregojnë rrezik të ulët për popullatën e përgjithshme./POLITIKO.AL