Organizata ndërkombëtare kritikon në Politiko promovimin e koncertit të West në Tiranë: Po normalizohet urrejtja

Suela Gjidede 

Më 11 korrik të këtij viti, reperi kontrovers amerikan, Kanye West, do të performojë ekskluzivisht në Tiranë.

Lajmi u publikua si arritje fillimisht nga kryeministri Edi Rama dhe mëe pas nga ministri i Kulturës, Blendi Gonxhe, ndonëse West, i njohur edhe si Ye, së fundmi u ndalua të hyjë në Mbretërinë e Bashkuar për shkak të komenteve antisemitike dhe një kënge që publikoi me titull “Heil Hitler”.

Për këtë arsye, edhe paraqitja e tij e planifikuar në një festival në Londër u anulua. Një tjetër performancë e planifikuar në turneun e tij evropian, në Chorzóë në Poloni muajin e ardhshëm, është anuluar gjithashtu. Australia po ashtu i ndaloi hyrjen Ëest-it në vitin 2025.

Kësisoj, promovimi i koncertit të Kanye West në Tiranë nga zyrtarë të lartë të qeverisë shqiptare ka ngritur pikëpyetje edhe jashtë vendit.

Organizata ndërkombëtare INACH (International Network Against Cyber Hate), e cila monitoron gjuhën e urrejtjes dhe ekstremizmin online, tha për Politiko.al se mbështetja publike ndaj figurave që përhapin mesazhe urrejtjeje mund të kontribuojë në normalizimin e urrejtjes dhe t’u japë atyre legjitimitet simbolik.

"Po, autoritetet publike udhëheqin me shembull dhe shpesh kanë shumë shtrirje kur mbështesin dhe promovojnë një artist që përhap mesazhe urrejtjeje. Kjo kontribuon në normalizimin e urrejtjes. Miratimi ose mbështetja nga një institucion publik nuk është neutrale. Aai mund të japë legjitimitet, besueshmëri dhe miratim simbolik", thekson Adinde Schoorl, përfaqësuese e organizatës INACH për Politiko.al, një rrjet ndërkombëtar me bazë në Amsterdam që merret me monitorimin e gjuhës së urrejtjes online, ekstremizmit dhe diskriminimit në internet.

Të pyetur se cilat standarde duhet të udhëheqin institucionet publike kur mbështesin figura të shoqëruara me retorikë të diskutueshme ose të dëmshme, INACH përgjigjet se institucionet publike nuk janë përgjegjëse vetëm për mbrojtjen e lirisë së shprehjes, por edhe për ruajtjen e kulturës demokratike.

"Institucionet publike nuk janë përgjegjëse vetëm për mbrojtjen e lirisë së shprehjes, por po aq edhe për ruajtjen e kulturës demokratike, kohezionit social dhe dinjitetit të barabartë të të gjithë anëtarëve të shoqërisë. Prandaj, mbrojtja e pakicave nga urrejtja është po aq e rëndësishme. Parimet udhëheqëse duhet të jenë angazhimi ndaj të drejtave të njeriut dhe mosdiskriminimit, mbrojtja e integritetit demokratik, transparenca, llogaridhënia, pluralizmi dhe proporcionaliteti", thekson Adinde Schoorl, përfaqësuese e organizatës. 

Në një kohë kur Londra, Polonia apo Australia janë diastancuar nga Ëest për shkak të retorikës së tij, Shqipëria rrezikon të përmendet jo për standardet kulturore që promovon, por për gatishmërinë për të kthyer në spektakël një figurë që në pjesën më të madhe të botës po trajtohet si problematikë publike dhe politike, jo thjesht artistike./ Politiko.al