Pas gafës për shqiptarët e RMV-së, Ferit Hoxha krijon tjetër 'furtunë' diplomatike

Ministri për Europën dhe Punët e Jashtme, Ferit Hoxha, është përfshirë sërish në polemika publike, këtë herë pas deklaratave të tij për marrëveshjen mes Shqipërisë dhe Italisë për emigrantët.

Çfarë ka ndodhur? 

Në një intervistë për Euractiv, Hoxha la të kuptohej se marrëveshja nuk pritet të zgjatet pas vitit 2030, duke argumentuar se deri atëherë Shqipëria synon të jetë anëtare e Bashkimit Europian.

“Fillimisht, është një marrëveshje pesëvjeçare dhe nuk jam i sigurt se do të ketë zgjatje. Së dyti, nuk do të ketë zgjatje sepse ne do të jemi anëtarë të Bashkimit Europian,” u shpreh ai.

Deklarata u interpretua si një sinjal politik për distancim nga marrëveshja e shumëdebatuar me qeverinë e Giorgia Meloni, e cila i jep Italisë mundësinë të përdorë qendrat në Gjadër dhe Shëngjin për ndalimin e emigrantëve të paligjshëm. Por reagimet e menjëhershme duket se e detyruan ministrin shqiptar të tërhiqej.

Tërheqja pas deklaratës
Pas debatit të krijuar në media dhe politikë, Hoxha publikoi një sqarim ku pretendoi se deklarata e tij ishte nxjerrë jashtë kontekstit dhe nuk përfaqësonte një ndryshim të qëndrimit zyrtar të qeverisë shqiptare.

Sipas tij, ai kishte bërë vetëm një “reflektim të çastit”, duke përmendur mundësinë që Shqipëria deri atëherë të jetë pjesë e BE-së, çka do ta ndryshonte automatikisht kontekstin juridik të marrëveshjes.

"Ka qenë kaq e thjeshtë. Nuk bëhet fjalë për një vendim, por thjesht për një reflektim të çastit, të shprehur me sinqeritet dhe spontanitet.

Kjo deklaratë nuk duhet në asnjë mënyrë të interpretohet si një ndryshim i qëndrimit të Shqipërisë në lidhje me protokollin.

Fatkeqësisht, në botën e sotme, zhurma shpesh përhapet më shpejt sesa argumenti, logjika dhe konteksti.

Shprehje të shkëputura nga konteksti shndërrohen shumë shpesh në narrativa që nuk pasqyrojnë as thelbin e diskutimit dhe as qëndrimin real të qeverive", shkroi ministri. 

Rama bën 'avokatin'

Megjithatë, ndërhyrja e menjëhershme e Edi Rama tregoi se çështja kishte krijuar shqetësim politik.
Në një reagim në rrjetin X, Rama theksoi se marrëveshja me Italinë do të mbetet në fuqi “për aq kohë sa Italia e dëshiron atë”, duke mbyllur çdo interpretim për një tërheqje të mundshme të Shqipërisë.

"Të gjithë gazetarëve nga Italia dhe më gjerë, që po kontaktojnë lidhur me një citim të pasaktë të raportuar nga një media pas një interviste me Ministrin e Jashtëm të Shqipërisë: më lejoni ta ritheksoj qartë, dhe shpresoj përfundimisht, se protokolli ynë me Italinë do të vazhdojë të jetë në fuqi, për aq kohë sa Italia e dëshiron atë", shkroi Rama. 

Opozita: Një tjetër gafë e kryediplomatit

Deklaratat e ministrit u shfrytëzuan menjëherë nga opozita, e cila e lidhi episodin me skandalin e disa javëve më parë, kur Hoxha u akuzua se kishte fyer shqiptarët e Maqedonisë së Veriut në një grup komunikimi të brendshëm.

Deputeti Belind Këlliçi deklaroi se ministri po kthehet në simbol të arrogancës dhe papërgjegjshmërisë së qeverisë.

Sipas tij, “kur një kryediplomat del çdo javë për të sqaruar atë që ka thënë, problemi nuk është keqkuptimi, por vetë mënyra si sillet dhe si mendon”.

Këlliçi kujtoi edhe episodin e mesazhit të publikuar më herët, ku ministri dyshohej se i kishte quajtur “idiotë” shqiptarët e Maqedonisë së Veriut, duke theksuar se kjo tregon një kulturë politike arrogante dhe përçmuese ndaj qytetarëve.

 Marrëveshja që vazhdon të ndajë politikën

Marrëveshja Shqipëri-Itali për emigrantët mbetet një nga projektet më të debatueshme të viteve të fundit. E promovuar nga qeveria italiane si model për menaxhimin e emigracionit jashtë territorit të BE-së, ajo është kundërshtuar nga organizata të të drejtave të njeriut dhe është përballur me sfida ligjore në Itali.

Edhe pse së fundmi një opinion jo-detyrues në Gjykatën e Drejtësisë së BE-së e konsideroi skemën në përputhje me ligjin europian, debati politik rreth saj nuk është shuar.

Ndërsa qeveria shqiptare përpiqet të ruajë ekuilibrin mes raportit strategjik me Italinë dhe aspiratës për integrim europian, deklaratat kontradiktore të ministrit të Jashtëm kanë hapur një tjetër front përplasjeje politike në Tiranë./Politiko.al