Shqipëria në mesin e 10 vendeve më të varfra të Europës

Shqipëria renditet ndër 10 vendet me GDP për frymë më të ulët në Europë, sipas të dhënave të Fondit Monetar Ndërkombëtar për vitin 2025, të bazuara në fuqinë blerëse (PPP).

Me një nivel prej rreth 25,600 dollarësh ndërkombëtarë për frymë, siç shkruan WorldAtlas, vendi mbetet në pjesën e poshtme të listës europiane, duke reflektuar hendekun e vazhdueshëm me ekonomitë më të zhvilluara të kontinentit.

Pavarësisht kësaj renditjeje, Shqipëria ka shënuar rritje ekonomike mesatare rreth 4% në vit gjatë periudhës 2022–2025, e nxitur kryesisht nga sektori i turizmit. Vetëm në vitin 2024, vendi ka pritur rreth 11.7 milionë vizitorë ndërkombëtarë, një shifër që tejkalon disa herë popullsinë rezidente dhe që e ka kthyer turizmin në një nga shtyllat kryesore të ekonomisë.

Megjithatë, raporti thekson se rritja ekonomike nuk ka arritur të zgjidhë problemet strukturore të vendit. Emigrimi i lartë i fuqisë punëtore, plakja e popullsisë, niveli i lartë i ekonomisë informale dhe sfidat në sundimin e ligjit vazhdojnë të ndikojnë negativisht në produktivitetin dhe zhvillimin afatgjatë.

Në këtë kontekst, Shqipëria mbetet një vend kandidat për anëtarësim në Bashkimin Europian, me negociatat e hapura që nga viti 2022, ndërsa Brukseli e konsideron si një nga vendet më të avancuara të procesit të zgjerimit, por ende larg standardeve ekonomike të BE-së.

10 vendet më të varfra në Europë (FMN WEO 2025)

Moldavia – rreth 19,700 dollarë

Kosova – rreth 20,400 dollarë

Ukraina – rreth 21,000 dollarë

Bosnja dhe Hercegovina – rreth 22,800 dollarë

Shqipëria – rreth 25,600 dollarë

Maqedonia e Veriut – rreth 24,300 dollarë

Bjellorusia – rreth 25,500 dollarë

Serbia – rreth 28,500 dollarë

Mali i Zi – rreth 31,000 dollarë

Bullgaria – rreth 36,000 dollarë