Skandale, arrestime dhe dorëheqje: Kadastra e Vlorës, vatra e korrupsionit që po shkrumbohet

Kadastra e Vlorës u mbyll pas vitesh të tëra skandalesh, hetimesh, denoncimesh dhe dështimesh të njëpasnjëshme institucionale, duke u kthyer në një nga shembujt më flagrantë të keqmenaxhimit të pronës publike në Shqipëri.

Vendimi për shkrirjen e saj nuk erdhi papritur. Ai është kulmi i një historie të gjatë ku vendimet e gjykatave nuk zbatoheshin, drejtuesit largoheshin njëri pas tjetrit, dhe ish-zyrtarë përfunduan në burg.

Vendim i Gjykatës së Lartë që nuk zbatohet

Një nga rastet më domethënëse që ekspozoi hapur dështimin e institucionit ishte moszbatimi i një vendimi të formës së prerë të Gjykatës së Lartë, për regjistrimin e 60 bashkëpronarëve të një pasurie prej 6094 m² në zonën e Ujit të Ftohtë, Vlorë.

Edhe pse gjykata u kishte dhënë të drejtë trashëgimtarëve ligjorë të Ismail Shehut, Agjencia Shtetërore e Kadastrës Vlorë refuzoi ta zbatojë vendimin, duke e mbajtur pronën të regjistruar vetëm në emër të 5 trashëgimtarëve, ndërkohë që në truall po ndërtohet një kompleks pallatesh.

Trashëgimtarët denoncuan publikisht se një ish-drejtor i Kadastres kishte pranuar se ishte kërcënuar me jetë për të bërë të pavlefshëm një vërtetim hipotekor ku ishin regjistruar 42 bashkëpronarë, duke nxjerrë një urdhër të brendshëm brenda një muaji.

Një institucion me 13 drejtues në 5 vite

Kadastra e Vlorës u shndërrua në një “fuçi baruti” për këdo që e drejtonte. Vetëm në 5 vitet e fundit, 13 drejtorë janë emëruar, shkarkuar ose kanë dhënë dorëheqjen.

Në vitin 2019, tre drejtorë u larguan brenda një muaji, pasi nuk arritën të zbatonin një tjetër vendim të Gjykatës së Lartë për një pronë në bregdet. Florian Almadhi dha dorëheqjen më 9 shtator, u zëvendësua nga Alteo Nazeraj që qëndroi më pak se 10 ditë, dhe më pas nga Elona Hodaj, e cila u largua në 9 tetor.

Edhe në vitet pasuese, situata nuk ndryshoi. Vetëm një vit më vonë, Kadastra ndërroi 7 drejtorë të tjerë, nga Taulant Canameti te Andi Binaj.

Emërime dhe shkarkime të shpejta në 2025

Në mars 2025, Erjon Galanxhi u emërua drejtor i Kadastrës së Vlorës, por qëndroi vetëm rreth tre muaj. Pas largimit të tij, drejtimin e mori Paola Sullaj, ndërsa në qershor 2025 u emërua Genc Deromemaj, i cili u largua në nëntor të po atij viti.

Ndërkohë, Erdet Mandi, një nga drejtuesit e fundit, u shkarkua me urdhër nga qendra pasi u kallëzua për shpërdorim detyre.

SPAK, kallëzime dhe hetime penale

Skandalet nuk mbetën vetëm në nivel administrativ. 8 zyrtarë dhe ish-zyrtarë të Kadastrës së Vlorës u kallëzuan në SPAK për shpërdorim detyre, pasi dyshohet se kanë legalizuar një objekt duke cënuar truallin e Komunitetit Mysliman të Vlorës.

Në listën e të kallëzuarve përfshihen drejtues aktualë dhe ish-drejtues, përgjegjës sektorësh dhe specialistë, për të cilët janë konstatuar shkelje të rënda në dhënien e lejeve të legalizimit dhe titujve të pronësisë.

Në korrik 2025, Policia Gjyqësore, me urdhër të Prokurorisë së Vlorës, kreu kontrolle në zyrat e Kadastrës, duke sekuestruar dhe fotokopjuar dosje që lidhen me një pallat të papërfunduar, për të cilin po hetohet ligjshmëria e lejes dhe shitja e shumëfishtë e apartamenteve.

Alarmi i Dhomës së Avokatisë: “Vatër abuzimi”

Dhoma Vendore e Avokatisë Vlorë i kërkoi zyrtarisht SPAK-ut dhe Prokurorisë së Vlorës të hetojnë Kadastrën, duke e cilësuar atë si “vatër të keqmenaxhimit dhe abuzimit”.

Sipas avokatëve: ishte krijuar pasiguri juridike masive, ishindëmtuar rëndë qytetarët dhe bizneset, ekzistonin dyshime serioze për korrupsion, shpërdorim detyre dhe pengim të drejtësisë.

Arrestime që vulosën imazhin e institucionit

Në nëntor 2021, Gjykata e Apelit në Vlorë la në fuqi masën “arrest me burg” për ish-drejtorin e Kadastrës, Klodian Troci, i akuzuar si pjesë e një grupi kriminal për falsifikim dokumentesh pronësie në Himarë dhe Dhërmi.

Gjatë kontrollit në banesën e tij, policia gjeti 65 mijë euro cash, ndërsa hetimet zbuluan një skemë të gjerë tjetërsimi pronash dhe grabitjeje dosjesh arkivore.

Nga skandalet te shkrirja

Të gjitha këto ngjarje – moszbatim vendimesh gjyqësore, rotacion absurd drejtuesish, kallëzime në SPAK, kontrolle, arrestime dhe denoncime publike – e çuan Kadastrën e Vlorës drejt kolapsit institucional.

Vendimi për shkrirjen e saj vjen si një pranim i heshtur i dështimit total të një institucioni që u kthye në simbol të korrupsionit me pronën.