Vartësit “iu shkrumbuan”, a ka ardhur radha e “shefes”?

POLITIKO.AL

SPAK ka nisur të nxjerrë në dritë një strukturë të tërë abuzimesh në prokurimet publike, ku vartësit dhe bashkëpunëtorët e Belinda Ballukut po marrin radhën njëri pas tjetrit për t’u pandehur.

Ndërkohë sot ishte radha e “shefes” për tu përballur me akuzat duke u marr nën hetim nga Spak. Por le të bëjmë një kthim pas në kohë, për të rikujtuar vartësit dhe shokët e ministres që janë marrë të pandehur.

Kreu i Komisionit të Prokurimeve Publike, Jonaid Myzyri, ish-drejtori i KESH, Erald Elezi, drejtori i ARRSH-së, Gentian Gjyli, dhe ish-kreu i ARRSH-së, Evis Berberi, janë vetëm disa nga 25 personat që tashmë po hetohen për shkelje të barazisë në tendera dhe shpërdorim detyre.

Myzyri, njeriu i ngushtë i ministres së Infrastrukturës Belinda Balluku, është thirrur bashkë me avokatin, për t’u pyetur si i pandehur. Ai akuzohet për veprën penale të shkeljes së barazisë në tendera, e kryer në bashkëpunim. SPAK dyshon se Myzyri ka lejuar abuzime në procedurat tenderuese të zhvilluara nga Komisioni i Prokurimit Publik gjatë viteve 2020–2023.

Kujtojmë se Myzyri ka qenë jurist tek kompania “Alko Impeks” e Arbër Abazit, teksa ky i fundit ka për bashkëshorte mbesën e Belinda Ballukut (vajzën e motrës). Kjo kompani ka parë një rritje të fortë gjatë viteve që në krye të vendit është e majta. Janë një numër i madh tenderash, nga veriu në jug, që janë fituar nga Arbër Abazi, herë edhe në shkelje të kritereve të prokurorimit.

SPAK ka marrë të pandehur më parë administratorin e Korporatës Elektroenergjitike Shqiptare (KESH), Erald Elezi. Atij i janë komunikuar akuzat për veprat penale “shpërdorim detyre” dhe “shkelje e barazisë në tendera”.

Bëhet fjalë për të njëjtin hetim ku është marrë i pandehur edhe drejtori i Autoritetit Rrugor Shqiptar (ARRSH) Gentian Gjyli, i cili po ashtu u thirr në SPAK për t’iu komunikuar akuza. Mësohet se janë gjithsej 25 persona dhe 3 subjekte kompani, të cilët janë marrë nën hetim dhe u janë komunikuar akuza për “shpërdorim detyre” dhe “shkelje e barazisë në tendera”, teksa bëhet fjalë për biznesmenë dhe zyrtarë publik, si edhe inxhinier të ARRSH-së.

Mes tyre i pandehur është marrë sërish edhe ish- kreu i ARRSH-së, Evis Berberi. Ndër fondet dhe tenderat e abuzuar janë edhe ato të Eficencës së Energjisë elektrike të subvencionuar nga BE.

Të gjitha këto institucione, të cilat dyshohen për abuzime me prokurimet publike janë në varësi të Ministrisë së Infrastrukturës dhe Energjetikës, të drejtuar nga Belinda Balluku.

Mes të pandehurve dhe të implikuarve janë edhe ish-kreu i Tatimeve, Ceno Klosi, dhe biznesmenë të lidhur me bashkëpuntoret e afërm të Ballukut, duke treguar se rrjeti është shtrirë gjerësisht në institucionet nën Ministrinë e Infrastrukturës dhe Energjisë.

Në këtë kuadër, pyetja lind natyrshëm,  a mund të jenë veprimet e vartësve dhe bashkëpunëtorëve kryer pa dijeninë e Ballukut? Të gjitha gjurmët tregojnë se trungu, pra vetë zv.kryeministrja dhe ministre, është pika kyçe e rrjetit.

Ajo që mbetet për t’u parë është nëse Rama, “rrënja” e kësaj strukture politike, do të qëndrojë afër saj duke e mbrojtur, apo do ta lërë të përballet me drejtësinë e SPAK.