Flash News

I kërkuar në Shqipëri për vrasje, arrestohet në Greqi Ardian Ahmetaj, shoku i Laert Haxhiut

Dita e dytë e “Giro d’Italia 2025”, rrugët që do bllokohen në Tiranë

Tre efektivë policie në Tiranë nën hetim për veprime arbitrare ndaj një të mituri

DW: Zgjedhjet parlamentare, provë vendimtare për në BE

Gazment Bardhi me akuza të forta: Terroristë elektoralë të Ballukut po blejnë vota në Fier

OP-ED

Biletat e Kombëtares/ Si Shqipëria, edhe kur bëhet e bukur, nxirret në ‘treg të zi’

Politiko 4 Tetor 2023, 12:51

Biletat e Kombëtares/ Si Shqipëria, edhe kur bëhet e bukur,

Shënim Editorial

Kombëtarja shqiptare ka të enjten, më 12 tetor, ‘finalen’ e saj të Europianit. Përballet me Çekinë e vendit të dytë në grupin E, për një rezultat që përcakton shumë për shanset e kualifikimit. Si asnjëherë më parë përfaqësuesja shqiptare ka mundësinë të përfundojë eliminatoret në krye të grupit dhe të shkojë direct, pa drama shtesë, në Europianin e Gjermanisë. Për një përfaqësuese e cila, para se Gianni de Biasi ta çonte në finalet e Francës, i mbyllte eliminatoret e parafundit në grup, duke lënë pas ekipe si Ishujt Faroe apo ndonjë tjetër të atij niveli, një arritje e tillë është në përmasat e fenomenales.

Për një vend të vogël si Shqipëria, që i ka të pakta arritjet, ky është një rast për tu kremtuar dhe krenuar. Tifozët e Përfaqësueses, ata që e ndjekin Shqipërinë edhe kur luan me Ishut Faroe apo Moldavinë, duke treguar një shenjë besnikërie, nuk janë të lumtur. Kjo nuk ka të bëjë me djemtë e Kombëtares, por me Federatën dhe alokimin e biletave për ndeshjen me Çekinë. Ka dyshime të shumta, por edhe prova se Federata ka lejuar, apo të paktën mbyllur sytë, para krijimit të një zinxhiri korruptiv që i ka hedhur pjesën më të madhe të biletave në tregun e zi. Një emision investigativ televiziv që do të transmetohet së shpejti ka prova për këtë.

Deklarata e Federatës pas presionit publik dhe përligjia e mungesës së transparencës me një transparencë të simuluar, nuk i shuan por i shton dyshimet. Bileta nuk shiten aq shpejt, as për ndeshje të rangut global. Nuk shkon justifikimi se pati problem aplikacioni online. Operaconi i organizuar me kujdes nga Federata për të mbajtur ‘nën kontroll’ grupet e organizuara të tifozerisë si TKZ etj, duke u dhënë bileta për të shmangur ‘shpërthimet’ e organizuara, nuk e ka zgjidhur problemin. Të dytët që janë englendisur janë ‘macet e shëndosha’ të pushtetit për të cilët, si gjithmonë Federata ka rezervuar tribunën kryesore apo VIP. Për publikun, apo atë pjesë që e ndjek Kombëtaren jo për selfie, dhe jo vetëm kur fiton apo kur është në prag të një suksesi të madh, ka patur shpërfillje.

Federata, duke lejuar bileta që të shkojnë drejt spekulantëve të tregut të zi hedh mbi vete hije korrupsioni. Së dyti, duke mos parashikuar një sistem të përshtatshëm të pajisjes me bileta, që njeh abonimet vjetore apo besnikëritë e tifozëve, shpall paaftësi në menaxhim. Duke qenë se, në kohën e teknologjisë, biletat shiten me emra, kjo jep mundësinë që Federata të ketë një databazë të tifozerisë. Me anë të saj mund të ‘shpërblehen’ tifozët që e kanë ndjekur Shqipërinë në ndeshjet ‘e dobëta’, kur stadiumi ishte thuajse bosh, si psh me Ishujt Faroe apo Moldavinë, pra kanë treguar mbështetje në ditë normale, apo të këqija. Janë ata të parët që duhet të ishin në ditën e suksesit të Kombëtares, para ‘fytyrave të panjohura’ që do shfaqen në stadium më 12 tetor, falë sistemit VIP të Federatës apo atyre që mund të përballojnë një biletë me pesë apo 10-fishin e çmimit në tregun e zi. Sistemi i abonimeve vjetore, kur një ‘tifozi’ i duhet të blejë si ndeshjen e dobët me Andorën, ashtu edhe atë të shumëlakmuarën me Italinë, është një tjetër mekanizëm që stadiumet e gjithë botës e ndjekin në nivel qytetesh apo kombëtaresh.

Përndryshe, Fderata dhe publiku do të gjenden gjithmonë në raste si ky me Çekinë, ku suksesi i ekipit në të cilin ka pjesë padyshim edhe Federata, do të njolloset nga amatorizmi menaxherial.

Në fund vlen për imazhin publik të Federatës, që ajo të jetë pjesë e një suksesi dhe triumfi pa shijen e keqe që krijon ky precedent. I cili dëshmon se gjërat në Shqipëri, edhe kur lëvizin për mirë pengohen nga huqet e vjetra të babëzisë.

Ata që e ndjekin Shqipërinë, pavarësisht se me kë luan, e kanë një ngushëllim. Në finalet e Gjermanisë biletat mund të blihen online apo në pikat e shitjes së qyteteve gjermane. Gishtat e federatistëve nuk arrijnë dot deri aty.