Flash News

Gjendet pas 6 ditësh trupi i pajetë i 29-vjeçarit në Klos

U arrestua pak metra larg SPAK, Prokuroria e Posaçme kërkon17 vite burg për ‘bosin’ e drogës

Starton sot Giro D’Italia, ja akset rrugore që bllokohen në Tiranë nga ora 13:00-18:00

Kush është Papa i ri?

Papa Leo i XIV përshëndet për herë të parë besimtarët në sheshin e Shën Pjetrit

OP-ED

Edi Rama me 2 satelitë: Çështje të Marrëzisë

Politiko 1 Tetor 2022, 14:53
Edi Rama me 2 satelitë: Çështje të Marrëzisë

Marsel Lela

Në veprën e tij, “Rrëfimet”, filozofi francez Jean-Jacques Rousseau përmend rastin e një princeshe, të cilës pasi i thanë që fshatarët nuk kanë bukë të hanë ajo u përgjigj, “Qu'ils mangent de la brioche” (le të hanë briosh). Të njëjtën gjë u tha edhe Edi Rama dje shqiptarëve, vetëm se në një mënyrë shumë herë më groteske. 

Me pak fjalë, shqiptarëve që vuajnë rritjen marramendëse të çmimeve të shportës, papunësinë, rrogat e vogla që shpesh nuk u paguhen as siguracionet, zbrazjen e vendit duke marrë në shpinë trastën e refugjatit më keq se në fillim të viteve ’90, terrorin mediatik të qeverisë për të kursyer energjinë elektrike, ndryshe do të përballen me katërfishim të çmimit – kryeministri i tyre u thotë: “le të hanë satelitët”.

Situata bëhet akoma më groteske kur kujtojmë se sa do t’u kushtojnë shqiptarëve dy satelitët që pritet të lëshojë në hapësirë Edi Rama. Janë gjashtë milion dollarë që do të paguhen për tre vjet, duke iu bashkangjitur afro katër milion dollarëve të tjerë për ndërtimin e ‘kopshteve të varura të Edomanisë” në oborrin e brendshëm të Kryeministrisë. 

Plot dhjetë milion dollarë nga xhepat e taksapaguesve për, jo projekte, por teka të një njeriu të velur nga pushteti dhe përroska imagjinare e politikanit të suksesshëm ku Rama e sheh veten çdo ditë. Dhe e gjitha në një kohë ku po ai fanitet orë e çast në ekranin e televizorit duke i porositur shqiptarët për ‘shtrëngim rripash’, heqjen e karikuesve të celularëve, hapjen rrallë të derës së frigoriferit, apo larjen kolektive në dush.

Nuk mbaron me aq. Groteskja bëhet absurd kur kryeministri tregon për të mirat që do t’i vijnë vendit tonë nga këta dy satelitë. Sipas tij, ata do të bëjnë të mundur evidentimin e ndërtimeve pa leje, të cilat Rama, si një Jon Snow i serialit Rilindja, shprehet se nuk e ka idenë se kush i ka dhënë. Për çfarë shërben një investim i tillë, kur inspektorëve dhe patronazhistëve nuk u shpëtojnë as dritaret ‘pa leje’ të artistit Bojken Lako, për të cilat desh e futën në burg, apo zgëqet e rrugëve ku fshatarët shesin ndonjë dorë spinaq? Ndërkohë, në demagogjinë e tij për dobinë e këtyre satelitëve, Rama nuk e di përse lë pa përmendur arat me hashash që harlisen në territorin shqiptar.

Duket sikur kryeministri, as në tokë dhe as në qiell, nuk sheh, ose bën sikur nuk sheh të njëjtën Shqipëri që shqiptarët shohin dhe jetojnë përditë. Ngjashëm me princeshën franceze të Rusoit, Rama habitet përse nënshtetasit e tij nuk hanë me lugë floriri kur ndërkohë ata nuk kanë as lugë!

Të fundit