Tre mënyra të thjeshta për të ngadalësuar plakjen e trurit

Truri ynë ka nevojë për sfida për të funksionuar mirë, por përfitimet shëndetësore nuk kërkojnë domosdoshmërisht përpjekje të mëdha apo lodhëse. Sipas ekspertëve, disa ndryshime të vogla në përditshmëri mund të ndihmojnë në ruajtjen e shëndetit të trurit dhe ngadalësimin e rënies njohëse me kalimin e moshës, shkruan BBC.

Studiuesit theksojnë se njerëzit shpesh priren të zgjedhin rrugën më të lehtë për të kursyer energji mendore, një prirje natyrale e trurit. Megjithatë, shmangia e sfidave mendore për një kohë të gjatë mund të ketë ndikim negativ në “rezervën njohëse” – aftësinë e trurit për t’u mbrojtur nga plakja dhe sëmundjet neurodegjenerative.

Ekspertët thonë se aktivitetet që stimulojnë mendjen, jetën sociale dhe mësimin e vazhdueshëm mund të ndihmojnë në ruajtjen e funksioneve kognitive për një periudhë më të gjatë.

Ushtrimi përmes orientimit hapësinor

Një nga mënyrat më efektive për të sfiduar trurin është përmes orientimit hapësinor. Ky funksion lidhet me hipokampusin, pjesa e trurit që shpesh ndikohet e para nga sëmundjet si Alzheimeri.

Studimet tregojnë se profesione si shoferët e taksive apo ambulancave, të cilët përdorin vazhdimisht orientimin në hapësirë, kanë norma më të ulëta të vdekshmërisë nga Alzheimeri. Kjo lidhet me përdorimin më intensiv të kësaj zone të trurit, duke ndihmuar në ruajtjen e saj.

Hulumtime të tjera kanë treguar se ushtrimet e orientimit hapësinor mund të ndihmojnë në përmirësimin e aftësive dhe në parandalimin e tkurrjes së hipokampusit me kalimin e kohës.

Qëndrimi aktiv në jetën sociale

Aktiviteti social është një tjetër faktor i rëndësishëm për shëndetin e trurit. Studimet tregojnë se personat me një jetë sociale më aktive kanë rrezik më të ulët për zhvillimin e demencës dhe ruajnë aftësi më të mira njohëse në moshë të shtyrë.

Tek individët më të moshuar, ata që mbeten socialisht aktivë priren të shfaqin shenja të demencës më vonë se të tjerët më të izoluar.

Sipas studiuesve, ndërveprimi social ndihmon edhe në uljen e stresit kronik, i cili lidhet me dëmtimin e neuroneve në hipokampus.

Mësimi gjatë gjithë jetës

Një nga faktorët më të fortë për plakje të shëndetshme është arsimi dhe mësimi i vazhdueshëm. Personat që kanë kaluar më shumë vite në arsim kanë rrezik më të ulët për demencë.

Mësimi i vazhdueshëm gjatë gjithë jetës ndihmon trurin të krijojë lidhje të reja nervore dhe të forcojë ato ekzistuese. Ky proces, i njohur si neuroplasticitet, e ndihmon trurin të përshtatet dhe të mbetet funksional për më gjatë.

Ekspertët theksojnë se edhe aktivitete të thjeshta si mësimi i një aftësie të re apo përfshirja në sfida mendore mund të kenë efekt mbrojtës afatgjatë.