Flash News

Tre efektivë policie në Tiranë nën hetim për veprime arbitrare ndaj një të mituri

DW: Zgjedhjet parlamentare, provë vendimtare për në BE

Gazment Bardhi me akuza të forta: Terroristë elektoralë të Ballukut po blejnë vota në Fier

Kandidati i PS para në këmbim të votave? Policia procedon personin që e denoncoi me video

Prokuroria kërkon tre burgime të përjetshëm për Dan Hutrën

OP-ED

Rama ka bërë një pakt të frikshëm dhe ai po e rrënon

Politiko 17 Maj 2018, 19:24

Rama ka bërë një pakt të frikshëm dhe ai po e

Fitim Zekthi

Oliver Cromwell, lordi protektor i Anglisë në mesin e shekullit të 17-të, teksa shpërndau Parlamentin, për shkak të korrupsionit të thellë që e kishte kapluar, iu drejtua deputetëve duke u thënë: “Ju e keni çnderuar këtë vend me përbuzjen tuaj ndaj çdo virtuti …A ka mbetur te ju ndonjë virtut i vetëm? A ka ndonjë ves që ju nuk e keni? Ju… nuk keni fe më shumë se sa kali im. Paraja është Zoti juaj. Cili nga ju nuk e ka shkëmbyer ndërgjegjen e tij me ryshfet? A gjendet mes jush ndonjë që kujdeset sadopak për këtë vend dhe njerëzit e tij, ju e keni kthyer këtë vend të shenjtë në një stallë derrash...?

Qeveria shqiptare, kryeministri, ministrat, njerëzit kryesorë që drejtojnë Partinë Socialiste, me mënyrën se si po sillen me çështjen e ministrit Xhafa, me mbrojtjen e verbër që i bënë atij duke mospranuar asnjë përgjegjësi morale dhe ligjore, duke iu hakërryer opozitës, duke deklarurar se videoja është e falsifikuar etj., e bëjnë fjalimin që ka mbajtur Cromëell në parlamentin anglez të duket si i mbajtur enkas për ta. Në fakt, shumica parlamentare e PS-së dhe qeveria, në mbledhjen e grupit, u soll si një grup njerëzish mes të cilëve nuk ka mbetur më asnjë virtut, u soll si një entitet që ka për zot vetëm paranë, që çdo grimë ndërgjegjeje e kanë shkëmbyer me ryshfet dhe korrupsion.

Është e paimagjinueshme të mbrohet një ministër i Brendshëm vëllai i të cilit shkon në burg vetë, i dënuar (për çfarë?) për trafik droge dhe organizatë kriminale, pasi iu shmang për vite me radhë. Është e paimagjinueshme të mbrohet një ministër i Brendshëm kur vëllai dyshohet se u mbrojt nga ai, se kryente deri vonë aktivitet kriminal dhe se shkoi në burg nga lufta e opozitës. Edhe sikur i vëllai të jetë dënuar me pa të drejtë, edhe sikur të jetë njeriu më i drejtë në botë, edhe ministri të jetë shqiptari më i vendosur për drejtësi, ai nuk mund të mbrohet kurrë duke qëndruar ministër.

Është folur shumë këto ditë për thyerjet e pazakonta që bëri kryeministri duke deklaruar si prokuror dhe si gjykatës se videoja është e falsifikuar, se mafia po sulmon ministrin Xhafa, se ata që nisën këtë sulm ndaj tij do të përgjigjen etj. Kjo është dëshmi e krizës së thellë në të cilën është qeveria shqiptare. Kjo qeveri nuk do të dalë kurrë më nga kjo krizë sa të jetë në këmbë. Ajo nuk do të dalë kurrë, sepse kjo krizë nuk është shkaktuar nga Fatmir Xhafa, as nga Saimir Tahiri dhe as nga shumë deputetë të dyshuar si të lidhur me krimin, apo të lidhur me krimin, që janë në Parlament, apo që e kanë lënë mandatin për shkak të ligjit të dekriminalizimit. Kjo krizë është shkaktuar nga kryetari i PS, Edi Rama (dhe drejtuesit e lartë të PS-së, mes tyre edhe Xhafa e Tahiri), i cili kohë më parë ka vendosur të bëjë një pakt me djallin.

Kohë më parë ai vendosi të fitojë zgjedhjet duke grumbulluar çdo “qelbësirë”, duke thirrur në grupin parlamentar dhe në skuadrën e Rilindjes, siç thoshte, njerëz që vinin nga bota e trafikut apo e krimit. Ky është pakti që Rama ka bërë me djallin dhe është ky pakt që qeveris vendin. Ky pakt po bën atë spektakël të turpshëm me mbrojtjen ndaj ministrit të Brendshëm, ky pakt e ka kthyer qeverinë dhe grupin parlamentar të PS-së në një grup të denjë për fjalimin e Cromwell-it. Një pakt me djallin nënkupton shitjen e shpirtit djallit dhe marrëveshje me Vdekjen. Ky pakt iu jep njerëzve mundësinë të kenë gjithçka duan menjëherë. Një ditë vjen djalli dhe kërkon të korrë gjënë që ka mbjellë.

Ai ka ardhur dhe po e korr atë që ka mbjellë.

Jeffrey Satinover, profesor në Harvard, e përshkruan këtë pakt dhe pasojat e tij me anë të një parabole të jashtëzakonshme. Ai tregon për një zog që fluturon mbi një qytet dhe dëgjon një tregtar që thërret: krimba për pupla. Zogu afrohet dhe sheh në tezgën e tregtarit krimba të mrekullueshëm, që rrezellijnë, të shëndetshëm, shumë të ndryshëm nga ata që zogu mezi i gërmonte duke u munduar pranë një lumi. Tregtari thotë: dy krimba një pupël. Zogu, kur sheh që ka shumë e shumë pupla, dhe kur sheh krimbat që e joshin pafund, shkul shpejt një pupël dhe merr dy krimbat. Shija ishte e jashtëzakonshme. Zogu erdhi përsëri të nesërmen. Erdhi përsëri ditë pas dite. Një ditë kur zogu mori krimbat dhe u përpoq të fluturojë ai u plandos në tokë. Ishte shëndoshur shumë dhe nuk kishte më pupla. Tregtari e mori zogun dhe e futi në kafaz pavarësisht ngashërimit dhe lutjeve të zogut.

Tregtari, në fakt, ishte djalli dhe zogu heshturazi kishte bërë një pakt me të. Këtë pakt ka bërë edhe kryeministri Rama dhe shumë drejtues të tjerë të qeverisë dhe të PS-së. Ky pakt çoi në mbjelljen e Shqipërisë me hashash. Ky pakt çoi në konçesione miliona euro, konçesione që vetëm kanë rritur borxhin dhe barrën mbi shqiptarët, por nuk kanë rregulluar as shëndetësinë dhe as infrastrukturën. Ky pakt sulmoi për katër vite opozitën si penguese të “reformës në drejtësi” si penguese të integrimit, si opozitë që nuk denoncon kot…. Ky pakt nuk pranonte trafikun e drogës me avionë, ky pakt e bëri kryeministrin të mbronte me tërsëllimë kryetarë bashkish dhe deputetë të akuzuar për lidhje me krimin. Ky pakt nuk lejoi arrestimin e ish ministrit Tahiri, ky pakt po mbron të pambrojtshmen, ministrin Xhafa.

Është e gjitha e kotë. Sot, Rama është i shëndoshur dhe pa pupla. Sot, tregtari që e joshi me krimba rrezellitës dhe të shëndetshëm, duke i marrë puplat, tregtari që e solli në pushtet, që bleu votat, mbolli Shqipërinë me hashash, emëroi në Polici dhe zyra të larta të shtetit njerëz në shërbim të tij, mori konçesionet, trafikoi drogë etj, sot ai tregtar e ka futur ose do ta fusë në kafaz Ramën.

Këtu nuk ka ndodhur asgjë rastësisht ose pa dashje. Është e sigurt se Rama dhe PS do t’i shkojnë deri në fund këtij pakti sepse nuk mund të dalësh dot nga ai pakt. Kur zogu e pa veten të shëndoshë dhe pa pupla, nisi të qajë dhe t’i lutet tregtarit t’i kthejë puplat, ai iu përgjigj: unë thashë krimba për pupla dhe jo pupla për krimba.