Kryeministri Edi Rama pritet të promovojë librin e tij të artit me një sërë krijimesh në Berlin.
Libri i titulluar ‘Work’ (puna) pritet të promovohet të dielën në ‘Art Berlin Fair’, në orën 13.30 i shoqëruar nga Anri Sala, i njohur edhe si autor e pjesëmarrës i shumë ekspozitave nëpër botë, Martin Herbert si kritik arti dhe moderuar nga Silke Hohman.
Por çfarë do të përmbajë ky libër?
Libri do të përmbajë momente nga puna e kryeministrit dhe krijimtari gjatë orarit të punës.
“Peneli i artistit dhe kryeministrit shqiptar, Edi Rama, është i pandashëm nga karriera e tij politike. Gjatë konferencave telefonike apo takimeve atë e sheh vazhdimisht duke bërë vizatime dhe akuarele mbi dosje, fletët e shënimeve, fakse, e shkresurina të tjera.
Kjo formë arti që ai prodhon është një regjistrim i gjallë të jetës politike dhe tensioneve të përditshme midis pushtetit dhe artit.
Ky libër është publikimi i parë i tij që paraqet vizatimet, skulpturat prej qeramike dhe sixhade, e cila u frymëzua nga një sixhade e ngjashme në zyrën e Ramës në Tiranë. E përbërë nga më shumë se shtatëqind vizatime të Ramës, sixhadeja përshkon të gjithë librin, duke krijuar një lidhje të jashtëzakonshme midis veprave të tij. Përveç eseve për punën e Ramës, libri përmban edhe një bisedë me artistin”, thuhet në përshkrimin e botuesit Hatje Cantz.
Libri kushton 29 euro.
Kujtojmë se në janar të këtij viti ai çeli ekspozitën e tij me skulptura në Berlin me titull “Work” (Puna) në galerinë Carlier/Gebauer në Berlin.
Ekspozita përfshinte një seri vizatimesh të reja, të krijuara nën dokumentet e punës, shënime të një dite normale në zyrë ose të krijuara nxitimthi gjatë një telefonate, ose një takimi zyrtar, si dhe skulptura qeramike, të cilat të sjellin imazhin e zyrës së tij në Tiranë.
Edi Rama ka botuar edhe dy libra arti me krijimet e tij në bashkëpunim me artistin e njohur Anri Sala, si dhe është autor e pjesëmarrës i shumë ekspozitave nëpër botë.
Financuar Nga Bashkimi Europian
