“Politika është shah”. Kështu ka deklaruar disa herë kryeministri Edi Rama dhe duket se ky parim i tij po përdoret edhe në debatin e ‘nxehtë’ të kalimit të marrëveshjes së 5 qershorit në Këshillin Politik për Reformën Zgjedhore.
Pas arritjes së dakordësisë së këtij pakti me bekimin e ndërkombëtarëve, ngërçi i radhës u ndesh në Kuvend. Ishte opozita e ashtuquajtur parlamentare në drejtimin e Myslym Murrizit, ajo e cila doli kundër votimit me pretendimin për ndryshime kushtetuese me tre kushte: ndryshim sistemi me lista të hapura, heqja e koalicioneve parazgjedhore dhe vendosjen e pragut 5% për hyrjen e partive në Kuvend.
Dy ditë më vonë, tre deputetë Artur Roshi, Besnik Troplini dhe Kostaq Papa “u penduan” dhe tërhoqën firmat e tyre.
Mirëpo, vendin e tyre e zunë menjëherë tre deputetë, Rreme Lala dhe Elena Xhina nga PDIU, të cilat njihen për qëndrimet pro mazhorancës në kuvend, si dhe nga Lefter Koka i cili kërkonte rritjen e pragut 5% nga 3% që është aktualisht për hyrjen e partive në Kuvend.
Kështu, në lojë hyjnë deputetë të tjerë për të mbajtur në këmbë nismën e opozitës parlamentare, pasi për të kërkuar ndryshime kushtetuese duhen së paku një grup me 28 deputetë.
E kujt është ideja e koalicioneve?
Kërkesat e 29 deputetëve firmëtarë të opozitës në parlament në fakt duket një plan sa i ‘çuditshëm’, aq edhe i dyshimtë, pasi debatin për koalicionet e ka nisur PS që në 2019-ën.
Nëse kthehemi pas në kohë del në pah se për koalicionet parazgjedhore ka folur edhe vetë Damian Gjiknuri, bashkëkryetari i Reformës Zgjedhore dhe anëtari i Këshillit Politik.
Në dhjetor të 2019-ës, Gjiknuri shprehej në report tv se nëse partitë opozitare dhe mazhoranca bien dakord për lista të hapura votimi, atëherë duhet të hiqen dhe koalicionet.
“Sistemi aktual nuk është i keq. Kemi bërë një marrëveshje të sistemit. Por ndryshimin ja kemi lënë partive opozitare që të vijnë të propozojnë. Presim opsionet që do vijnë. Kam dëgjuar që edhe nga PD po kërkon ndryshim të sistemit. Ne nuk jemi iniciator. Por partitë opozitare vijnë me ide edhe ne do të bisedojmë. Jemi të gatshëm të sjellim sistem, por të bindemi pse ka organizim të mirë. Mund të kemi propozim edhe nga ana jonë. Mund të pranojmë por do negociojmë edhe ne.
Personalisht mendoj se nëse ka propozim për lista të hapur kemi rastin e heqjes së koalicionit. Pra nëse pranohet sistemi me Lista të hapura, ne do të propozojmë heqjen e koalicionit. Kjo ka shumë lidhje, që të mos përfitojë një parti nga një parti tjetër. Bujrum i themi drafteve të opozitës. Por nuk kam parë asnjë shkrim. Parimet janë gjë tjetër. T’i sjelli në komisionin e Zgjedhores dhe do t’i shikojmë. Nëse janë të mira do t’i shqyrtojmë”, deklaronte Gjiknuri.
6 vota në total
Dje, tre deputetë të tjerë të opozitës së re deklaruan votën pro draftit të marrëveshjes zgjedhore që do të futet për t’u miratuar në seancën plenare të 23 korrikut.
Veç Suzana Topit, Gjetan Gjetanit dhe Lefter Maliqit, do votojnë pro edhe Fatjona Dhimitri, Artur Roshi dhe Besnik Troplini, në total 6 vota.
Në një përllogaritje, rezulton se mazhoranca ka 74 vota, bashkë me 6 të opozitës parlamentare shkon në 80. Pra, që marrëveshja të votohet në kuvend duhen edhe 4 vota të tjera, një lëvizje ‘shahu’ në duart e Ramës.
Kjo për faktin se këto katër vota nuk janë emra të palakuar sa i takon ‘lojërave’ politike në Kuvend. Bëhet fjalë për deputetët Elena Xhina, Reme Lala dhe Lefter Koka, të cilët firmosen propozimin e Murrizit për heqjen e koalicioneve parazgjedhore, fill pasi u tërhoqën tre të vetët (Artur Roshi, Besnik Troplini dhe Kostaq Papa), që si duket Partia Socialiste u kujdes që loja të vazhdojë, duke futur në radhët e “opozitës së re”, tre deputetë që kanë votuar sistematikisht pro nismave të mazhorancës. Burime të politiko.al bëjnë me dije se edhe Tom Doshi mund të dalë pro Murrizit, por qëndrimi i tij nuk është ende zyrtar.
Kjo do të thotë se Rama i ka edhe 4 votat e nevojshme për votimin e marrëveshjes, por në këtë periudhë parazgjedhore duket se i leverdis propozimi i Murrizit për heqjen e koalicioneve përballë PD dhe LSI.
Financuar Nga Bashkimi Europian
