Zyra e Bashkimit Evropian në Tiranë ka reaguar mbi debatin që është zhvilluar në Komisionet e Kuvendit për marrëveshjen midis Shqipërisë dhe Frontex. Përfaqësuesit e Brukselit në vendin tonë thonë se kjo marrëveshje “do të kontribuojë për rritjen e sigurisë dhe garantimin e një menaxhimi më të mirë të migrimit të parregullt në Shqipëri dhe në të gjithë rajonin.”
Në reagim sqarohet se menaxhimi i kufijve shqiptarë do të mbetet kompetencë e autoriteteve shqiptare, ndërkohë që hyrja në fuqi e marrëveshjes nuk lidhet me mekanizmin për pezullimin e vizave.
“Hyrja në fuqi e marrëveshjes ndërmjet Shqipërisë dhe Agjencisë Evropiane të Rojeve Kufitare dhe Bregdetare (Frontex) në të ardhmen do të kontribuojë për rritjen e sigurisë dhe garantimin e një menaxhimi më të mirë të migrimit të parregullt në Shqipëri dhe në të gjithë rajonin. Negociata për marrëveshje të tilla kanë përfunduar me partnerë të tjerë të Ballkanit Perëndimor. Menaxhimi i kufijve shqiptarë mbetet kompetencë e autoriteteve shqiptare.Agjencia u ofron vetëm ndihmë dhe mbështetje autoriteteve kompetente kombëtare, në frymën e bashkëpunimit të ndërsjelltë. Nuk ka lidhje mes hyrjes në fuqi të marrëveshjes dhe mekanizmit për pezullimin e vizave. Është në interes si të Shqipërisë ashtu dhe të BE-së që të rrisin më tej bashkëpunimin e tyre për migracionin dhe sigurinë”, thuhet në reagimin e BE-së.
Deputetët e opozitës kanë ngritur shqetësimin për paaftësinë e autoriteteve, siç shprehen ata, për të kontrolluar kufijtë e vendit. Rreth 45 oficerë të Frontex pritet të vijnë në Shqipëri.
Ndonëse ky debat nga opozita po bëhet vetëm tani që marrëveshja hyn në fuqi, Politiko.al ka raportuar që më 6 tetor të 2018-ës për kompetencat e zgjeruara që Frontex merr më ketë marrëveshje brenda territorit shqiptar, ndërkohë që një marrëveshje e tillë nuk është nënshkruar me asnjë vend tjetër të Ballkanit Perëndimor.
Katër muaj më parë Politiko.al raportonte, bazuar në marrëveshjen e nënshkruar nga ish-ministri Fatmir Xhafaj, se “Frontex jo vetëm që do të veprojë në kufijtë e Shqipërisë njësoj si rojet tona kufitare, por do të ketë mundësinë të organizojë aksione edhe brenda territorit shqiptar, çka nuk i lejohet në asnjë prej vendeve të BE-së.”
Gjithashtu, rojet dhe personeli i kësaj agjencie do të jetë i armatosur, ndërkohë që ata nuk do bëhen subjekt i ligjeve shqiptare. Edhe të dhënat personale të çdo shqiptari do të jenë në duart e rojeve të huaja, sa herë ata i konsiderojnë të rëndësishme për aksionet.
Marrëveshja nuk specifikon se deri ku shtrihen kompetencat e Frontex dhe nëse kjo agjenci do të mund të kryejë apo jo ndalime dhe arrestime në Shqipëri, por mjaftohet vetëm me termin ‘operacione të përbashkëta’.
Discussion about this post