Foto/ Të paktën 13 të vdekur, ja çfarë ka mbetur nga sulmi me raketa ruse në Ukrainë

Rusia ka nisur një valë sulmesh ajrore kundër qyteteve në të gjithë Ukrainën, përfshirë Kievin, duke lënë të paktën 13 të vdekur. Njëmbëdhjetë persona duke përfshirë një fëmijë u vranë në një sulm që goditi një bllok banesash në qytetin qendror të Umanit, thanë zyrtarët.

Dhe një grua dhe vajza e saj trevjeçare u vranë në qytetin e Dnipro, sipas kryebashkiakut lokal. Shpërthime janë raportuar edhe në qytetin Kremenchuk në Ukrainën qendrore.

Presidenti ukrainas Volodymyr Zelensky tha se blloku i apartamenteve ishte në mesin e 10 ndërtesave të banimit që u dëmtuan në Uman. Shërbimi shtetëror i shpëtimit tha se fëmija i vrarë në qytet kishte lindur në vitin 2013 dhe 11 persona të tjerë kishin nevojë për trajtim spitalor.

Zelensky tha se sulmet treguan veprime të mëtejshme ndërkombëtare që duhen ndërmarrë kundër Rusisë.

"E keqja mund të ndalet me armë - mbrojtësit tanë po e bëjnë këtë. Dhe mund të ndalet me sanksione - sanksionet globale duhet të rriten," tha ai në një postim në Twitter.

Kreu i administratës ushtarake të qytetit të Kievit tha se ky ishte sulmi i parë raketor rus në kryeqytet në 51 ditë. Nuk ka raporte të menjëhershme për viktima civile në kryeqytet.

Njëzet e një nga 23 raketa dhe dy dronë sulmues u rrëzuan nga sistemi i mbrojtjes ajrore të Ukrainës, thanë zyrtarët në një postim në shërbimin e mesazheve Telegram.

Një video e postuar në Telegram nga Shërbimi Shtetëror Kufitar i Ukrainës tregoi një ndërtesë apartamentesh të dëmtuar rëndë në Uman pas sulmeve.

Një banore e një blloku banesash të dëmtuara, Olga, i tha agjencisë së lajmeve Reuters se dritaret u hodhën nga banesa e saj "më pas erdhi shpërthimi".

Një burrë qau teksa shihte shërbimet e urgjencës duke marrë një trup me barelë. Një tjetër banor vendas tha se dëgjoi një shpërthim në orën 04:30 me orën lokale (02:30 GMT) dhe "pati dy shpërthime shumë të forta, gjithçka filloi të digjej, makinat filluan të digjen".

Sulmet vijnë pasi forcat ukrainase thonë se janë gati të nisin një ofensivë ushtarake me pajisje të reja, duke përfshirë tanke, të furnizuara nga aleatët perëndimorë. Rusia ka luftuar për të ecur përpara në një ofensivë dimërore, duke përfshirë një betejë 10-mujore për kontrollin e qytetit të rëndësishëm strategjik të Bakhmut.

Nuk ishte e qartë menjëherë se çfarë synonte Rusia në sulmet e së premtes, por ajo ka sulmuar më parë infrastrukturën civile. Moska ka thënë më parë se nuk synon qëllimisht civilët, por mijëra janë plagosur dhe vrarë në të gjithë Ukrainën që nga pushtimi i Rusisë.