Nga unifikimi i Abetares dhe marrëveshja Shqipëri-Kosovë për lejet e qëndrimit te njohja e siguracioneve, vendimet që mori qeveria

Këshilli i ministrave është mbledhur ditën e sotme për të nënshkruar disa vendime, që u bënë publike nga drejtuesit përkatës së institucioneve. Ministrja e Arsimit Evis Kushi tha se është marrë vendimi për unifikimin e tekstit të Abetares.

Ndryshe nga çfarë ka ndodhur më herët, tashmë të gjitha shkollat e vendit do të punojnë me të njëjtin tekst dhe nuk do të jenë mësuesit ata që do të zgjedhin ndër disa alternativa.

"Sot në mbledhjen e Këshillit të ministrave morëm një vendim të rëndëishëm që lidhet me përjashtimin nga procedura e përzgjedhjes së mësuesëve në bazë shkolle të tekstit të Abetares.

Në arsimin parauniveristar për çdo lëndë ne kemi tekste alternative dhe mësuesit e çdo lënde mblidhen së bashku dhe vendosin të zgjidhin një nga tre alternativat që janë të miratuara në katalogun e Ministrisë së Arsimit.

Kemi vendosur që nga kjo procedurë të përjashtohet teksti i Abetares. Që do të thotë se të gjithë nxënësit në të gjitha shkollat e Shqipërisë të kenë një tekst të unifikuar", tha Kushi.

Ndërsa ministri i Brendshëm Bledi Çuçi bëri me dije se u miratua një marrëveshje që pritet të nënshkruhet ditën e premte në mbledhjen mes dy qeverive, Shqipërisë dhe Kosovës.

Ai tha se bëhet fjalë për lejet e qëndrimit mes dy vendeve, duke nënvizuar se është bërë e mundur lehtësimi i procedurave për qëndrimin dhe lejen e punës për shqiptarët që zgjedhin të jetojnë mes dy shteteve.

"Sot miratuam një nga marrëveshjet që do të nënshkruajmë ditën e premte në mbledhjen e përbashkët mes qeverisë së Shqipërisë dhe Kosovës. Marrëveshja ka të bëjë me lejet e qëndrimit të shtetasve respektivë. Është një lajmi i mirë shtetasit e Kosovës që tashme thjesht me një aplikim dhe pa dokumenta lejen e qëndrimit për 5 vite në Shqipëri dhe brenda sa do jetë dhe leja e punës. Lajm i mirë dhe për shqiptarët që punojnë dhe jetojnë në Kosovë që do të marrin leje qëndrimi me procedura shumë më te lehtësuara. Vendimi i sotëm është në vazhdën e disa marrëveshjeve", tha Çuçi.

Ky i fundit u pyet nga gazetarët për lajmet e mediave britanike, duke mohuar sërish ndërtimin e kampeve të refugjatëve në Shqipëri.

"Besoj se është thënë qartë që nuk do kete kampe refugjatësh në Shqipëri për interesa të shteteve të tjera", shtoi ministri.

Një tjetër marrëveshje që do të nënshkruhet të premten lidhet me mbrojtjen sociale të qytetarëve të Shqipërisë dhe Kosovës. Ministrja e Ekonomisë Delinda Ibrahimaj bëri me dije se është miratuar marrëveshja për njohjen e sigurimeve shoqërore të qytetarëve të Kosovës që zgjedhin te jetojnë në Shqipëri dhe anasjelltas.

"Një marrëveshje që pritet të nënshkruhet ditën e premte në mbledhjen e dy qeverive dhe ka të bëjë me mbrojtjen sociale të qytetarëve për njohjen e sigurimeve shoqëror", tha ministrja.