Berisha: Chris LaCivita është forcë madhore në fitoren e ardhshme të Aleancës për Shqipërinë Madhështore

Kreu i Partisë Demokratike, Sali Berisha nga konferenca me gazetarët e konsideroi Chris LaCivita-n, drejtuesin e fushatës zgjedhore të PD, një forcë madhore në fitoren e koalicionit opozitar.

Berisha tha se arkitekti i fitores së Trump ka tmerruar Ramën, i cili e sulmoi sot nga mbledhja e grupit parlamentar të PS, duke e quajtur “makijazh trampist”.

Kreu i demokratëve theksoi se Rama sulmoi LaCivita-n, pasi ky i fundit e quajti “kukull të Gorge Soros”.

“Çfarë do që të them sot, nuk mund të mos jetë kushtuar arritjes kryesore të PD-së, koalicionit të saj me përfaqësuesit e 26 partive, por herë-herë edhe 30, është një garanci madhore e shpëtimit të Shqipërisë me 11 maj dhe hapjes së epokës apo kohës së Shqipërisë Madhështore.

Edi Rama ka bërë përpjekje të dënueshme, të jashtëzakonshme për të sabotuar këtë koalicion që e tmerron.

Por ky koalicion sot është realitet dhe mund të quhet me sinonim tjetër, koalicioni i fitores.

Por meqenëse objektivi më madhor i këtij koalicioni është Shqipëria Madhështore, atëherë u vendosë të quhej Aleanca për Shqipërinë Madhështore.

Në paraqitjen time në momentin e shpalljes së këtij koalicioni rreshtova disa faktorë që janë realë dhe të padiskutueshëm.

Por këtu do ndalem dhe në një faktor tjetër.

Arkitekti, kryearkitekti, kryestrategu, bashkëkryestrategu i fitores më të madhe, i rikthimit më vendimtar në historinë e njerëzimit, të Donald Trump, edhe ai përbën në vetvete, Chris LaCivita, një forcë madhore në fitoren e ardhshme të këtij koalicioni.

Edi Rama, sot i tmerruar nga këto zhvillime, ka ironizuar dhe atakuar pikërisht këtë moment me të cilin ai ndjehet i pashpresë.

Nuk jam marrë kurrë me kompanitë konsulente që ai ka kontraktuar se nuk është normale. Kurse ai këto ditë merret.

Merret natyrisht sepse kryetari i Komitetit Kombëtar Republikan, Chris LaCivita e quajti Edi Ramën siç është, kukulla e Xhorxh Sorosit.

Tani Edi Rama, në vend që të merret me padronin e tij dhe kukull siç është vetë, merret me njeriun që i tha të vërtetën në sy.

Dhe këto janë zgjidhjet e tij e njeriut të pashpresë në këtë garë.

E njeriut që në përzgjedhjen e kandidaturave dëshmoi zero transparencë.

E njeriut që shumëzoi me zero në përzgjedhjen e kandidaturave të gjithë strukturat e partisë së tij, anëtarësinë, komitetet e partisë dhe forumet e tjera. Pra, përdori praktikat më obskure në nxjerrjen e kandidatëve. Por kjo nuk pritej ndryshe!”, deklaroi Berisha.