Berisha nga SPAK: Prokuroria politike e Ramës krijoi një piramidë mashtrimi, firma ime nuk ekziston në dokumente

Lideri i opozitës, Sali Berisha foli nga ambientet e jashtme të SPAK ku deklaroi se me dosjen "Partizani", prokuroria politike private e Edi Ramës, siç iu referua SPAK-ut, ka krijuar një piramidë mashtrimi.

Berisha u shpreh se në dokumentet që SPAK ka paraqitur nuk ekziston asnjë firmë e tij, por përkundrazi, të gjitha lejet për ndërtim janë dhënë nga Rama, Basha dhe Veliaj.

Ai deklaroi se hetimet nisën pas një kallëzimi të rremë nga Taulant Balla.

Berisha: Prokuroria politike private e Edi Ramës SPAK bazuar në kallëzimin e rremë të kreut të grupit të PS ka hetuar Sali Berishën deri tek mbesat e tij, në një kohë kur ato nuk kishin lindur ende. Ata kanë hetuar veprimtarinë e PD. Por, me urdhër politik mercenarët e Prokurorise politike mbajnë në arrest antikushtetues liderin e opozitës pa asnjë fakt e dokument, përveçse me dëshirën dhe vendimin e Edi Ramës, kërkesën e tij publike në Kongresin e PS dhe Asamblenë. Si edhe me kërkesën publike të njohur të zyrtarëve dhe diplomatëve të korruptuar si Mc Gonigal e të tjerë.

SPAK-prokuroria private politike e Edi Ramës me dosjen e Klubit Partizani krijoi një piramidë mashtrimi, fshehu dhe manipuloj qendra dokumente publike, kreu shkelje kushtetuese të përsëritura dhe la në burgim të paligjshëm shtëpie Sali Berishën, me qëllimin e vetëm për t’i shërbyer Edi Ramës.

Nga ky hetim që zgjati sa një lufte botërore REZULTON SE:

Në dosjen e Klubit Partizani nuk ka absolutisht çështje penale; mungon fakti penal dhe shteti nuk ka humbur asnjë cent para publike, përkundrazi veç ka fituar nga zbatimi i ligjit.

Sali Berisha u vu nën arrest me kallëzimin e rreme të Taulant Ballës se toka ne territorin e Klubit Partizani nuk ju takonte pronarëve mbasi ishte shpronësuar nga autoritet italiane. Prokurorët e dinin që ky ishte mashtrim sepse fletoret zyrtare të vitit 1942-1943 faktojnë qartë se ajo toke nuk është shpronësuar kurrë por ishte vendosur nën rekuizim për 6 muaj.

Të gjitha lejet e zhvillimit të kësaj prone janë dhënë nga Edi Rama, Lulzim Basha dhe Erion Veliaj.

Nga dhjetëra zyrtar që kanë firmosu dokumentet e procesit të njohjes dhe kthimit të pronarët legjitim të tokës së konfiskuar nga regjimi komunist dhe para blerjen prej tyre të objekteve të Klubit Partizani asnjë nuk është në ndjekje penale sepse ata kanë zbatuar strikt ligjet e vendit.

Firma e Sali Berishës nuk ekziston në asnjërin prej këtyre dokumenteve.

Nuk ka asnjë provë, dëshmi apo dokument që të tregojë se Berisha ka kërkuar apo ka bërë presion ndokujt që të firmosë qoftë dhe një dokument të vetëm në procesin e njohjes dhe kthimit të pronës dhe të të drejtës së parablerjes, në rastin e privatizimit të klubit Partizani.