Berisha: Kërcënimi me vdekje nga Ramaduro i gjyqtarit dhe prokurorit të Ballukut, akt i rëndë kriminal mafioz

Kryetari i PD, Sali Berisha ka denoncuar kryeminstrin Rama, të cilin e quan “Ramaduro i Europës”, për një kërcënim të hapur me vdekje ndaj gjyqtarit dhe prokurorit që vendosën pezullimin e zv/kryeministres Belinda Balluku.

Berisha shkruan në rrjetin e tij social facebook se Rama, para se të niste shqyrtimi në apel, citonte një prokuror amerikan për të dërguar “mesazhin mafioz”, duke e lidhur këtë me aferat korruptive të Ballukut dhe Ramës.

Berisha thekson se pezullimi i Ballukut u bë në përputhje me ligjin dhe Kushtetutën, ndërsa akuzon Ramën se është i gatshëm të kryejë çdo krim për pushtet. Kryetari i PD, Sali Berisha denoncon kërcënimin si akt mafioz dhe paralajmëron se kjo duhet të shërbejë si sinjal për rrezikun që paraqet qeverisja aktuale ndaj drejtësisë.

Reagimi i plotë:

Kërcënimi me vdekje nga Ramaduro i gjyqtarit dhe prokurorit të Ballukut, një akt i rëndë kriminal mafioz.

Sot Edi Rama, apo Ramaduro i Europës, në tmerr dhe panik vetëm pak orë para shqyrtimit në apel të vendimit të GJKKO për pezullimin nga detyra të Ballukut, në një akt të pashembullt mafioz e kriminal, kërcënoi haptas me vdekje gjyqtarin dhe prokurorin e vendimit.

Për të dhënë mesazhin mafioz, Rama nuk iu dërgoi plumb në zarf, por citoi fjalët e një prokurori amerikan, i cili sipas tij ka thënë:
“Kur prokurori kërkon njeriun përpara krimit, drejtësia vdes; dhe kur një pushtet hyn në territorin e një tjetri, Kushtetuta demokratike nuk merr më frymë, por mbytet.”

Citimi i këtij paragrafi, ndërkohë që Lubi Balluku me peshën e 90 milion eurove të vjedhura së bashku me Ramën, nisej për në sallën e gjyqit, ishte një kërcënim madhor me vdekje për ata që kanë vendosur pezullimin e bashkëvjedhëses së tij, zv/kryeministres.

Ky është kërcënim me vdekje i zyrtarëve në detyrë nga njeriu që për pushtetin e tij është i gatshëm të kryejë çdo krim.
Ky nuk është kërcënim për pezullimin e Ballukut, por drejtpërdrejt kërcënim me vdekje, sepse në aferën e Tunelit të Llogarasë dhe afera të tjera, Rama është Hajduti i Parë, Lubia vjen fill pas tij.

Shtoj këtu se në rastin e Lubi Ballukut, çdo masë dhe çdo hap është ndërmarrë në përputhje të plotë me ligjin dhe Kushtetutën, madje me zbatimin e tyre në formën më të lehtë të mundshme. Sepse, në rast se do të zbatonin me rigorozitet ligjin, Lubia duhet të ishte si Lali Vjedhësi, dhe sot Ramës duhej t’i komunikohej akuza për vjedhjen në bashkëpunim të 90 milion eurove.

Heqja e imunitetit dhe arrestimi i Lubisë do të ishte zbatimi i plotë i frymës dhe germës së Kushtetutës së vendit, për qeveritarët dhe zyrtarët e lartë gjakpirës që pasurohen duke vjedhur qytetarët e tyre.

Në vend të këtij vendimi, bazuar në germën dhe frymën e kodeve të vendit, u vendos pezullimi nga detyra i hajdutes më të madhe në historinë e kombit.
Natyrisht, me këtë masë duhet pranuar se u hap rruga për pezullimin, fill pas saj, të hajdutit më të madh në historinë e kombit, që sot kërcënon me vdekje gjyqtarë dhe prokurorë, sepse i është futur uji nën prapanicë.

Duke dënuar me forcën më të madhe këtë kërcënim mafioz të Edi Ramës, këtë status përsëri po e mbyll me:

Keni parë, s’keni parë, shkon një i vdekur me një të gjallë, të dy hipur në një kalë.