Berisha: Lubi Balluku shpenzon 10 mijë euro në muaj vetëm për të larë makinën

Lideri i opozitës, Sali Berisha, ka zhvilluar një takim me pensionistët ku ka kritikuar ashpër qeverinë Rama dhe ministrat e tij për shpërdorimin e parave publike dhe mungesën e ndjeshmërisë ndaj problemeve të qytetarëve.

Berisha solli si shembull një tender të hapur nga Ministrja Balluku për pastrimin e automjetit të saj, një shpenzim prej 10 mijë eurosh në muaj që, sipas Berishës, po paguhet nga taksat e qytetarëve, përfshirë pensionistët që po përballen me vështirësi të mëdha ekonomike.

“Të verbuar nga luksi dhe të shkëputur krejtësisht nga hallet e njerëzve, nga jetesa e tyre, dje, do të më lejoni këtu, mediat publikojnë një fakt që në fakt nuk e kisha dëgjuar kurrë.

Po, druaj se nuk e ka dëgjuar ndonjëherë asnjë njeri.

Ministrja që unë e quaj Lubi Balluku, por e ka pak Lubi Balluku, hap tender për pastrimin e përditshëm të veturës së saj.

Dhe Ballukja kërkon larje të plotë të automjetit brenda dhe jashtë për 30 minuta. Pastrimi nga brenda bëhet me fshesë dhe kompresor. Larja e automjetit me solucion dhe jo furçë. Orari i kryerjes së shërbimit nga ora 7 deri në 9 çdo ditë të javës. Automjeti do presë në radhë për kryerjen e shërbimit jo më shumë se 30 minuta.

Automjeti Audi A8, dhjetë mijë euro në muaj.

E mora në telefon një nga njerëzit shumë të pasur që njoh,dhe i them, a më thua pak, atë veturën tënde ku e pastron ti. E pastron shoferi, më tha, dhe kur bie në baltë, e çoj në një lavash dhe e laj dhe kaq.

Urdhëroni tani, 10 mijë euro në muaj paguhen nga pensionet tuaja, nga taksat, absolutisht nuk kisha dëgjuar kurrë në jetë një gjë të tillë.

Ajo që reciton!

Dhe sigurisht që këto 10 mijë euro i ndan. Janë të marrë vesh me një servis që hajde ndajmë paratë.

Pra shkojnë gjer në këto pandjeshmëri të mëdha ndaj problemeve të qytetarëve”, deklaroi Berisha.