“Fol me shefin e madh, dua ta takoj”/ Salianji akuzon policinë për manipulim të dëshmisë së Alizotit në çështjen 'Babalja'"

Deputeti i Partisë Demokratike, Ervin Salianji, ka bërë publike disa përgjime telefonike të siguruara nga Prokuroria, të cilat përfshijnë një bisedë mes Albert Nushit, drejtor i policisë së Fierit, dhe Fredi Alizotit.

Sipas Salianjit, Alizoti është paguar nga ish-zyrtarë të policisë, ndërsa në përgjimin e publikuar duket se ata diskutojnë për çështje pagesash. Salianji pretendon se pas marrjes së këtyre pagesave, Alizoti ka ndryshuar dëshminë e tij lidhur me çështjen “Babalja”. Fillimisht, Alizoti kishte akuzuar Agron Xhafajn për përfshirje në trafik droge, por më pas deklaroi se kishte imituar zërin e vëllait të ish-ministrit të Brendshëm.

“Janë qindra komunikime mes drejtuesve të lartë të Policisë së Shtetit. Ndodhen në dosjen zyrtare të Prokurorisë. Ka dhjetëra komunikime të ish-drejtorit të Përgjithshëm të Policisë, ish-drejtuesve të policisë, ish-prokurorit të çështjes Gentjan Osmani ku në të gjitha rastet vendosen në dispozicion dhe shërbenin për t’u marrë para, për të paguar lekë, për të vendosur kohën se kur do të bëhej arrestimi fals ku dëshmitari i rremë Alfred Alizoti të bënte burg në këmbim të parave që paguhen nga drejtuesit më të lartë të policisë. Drejtori i Policisë së Fierit i thotë se shefi është jashtë përkon me datën 7-8 qershor kur Fatmir Xhafaj si ministër i Brendshëm ishte në një aktivitet zyrtar në Kroaci”, u shpreh Salianji.

Pjesë nga përgjimet, 8 qershor 2018

Albert Nushi, ish-drejtor i Policisë së Fierit, i telefonon Fredi Alizotit 

Albert Nushi: Je i madh. I more ato?

Alizoti: I madh jam unë e nuk kthehem mbrapa, ato që janë do vazhdojnë.

Albert Nushi: Po, po, i more ato?

Alizoti: Do sjellësh njeri të më takojë mua se jam këtu lart ku më latë atë natë. Se nuk dua të marr në telefon se jam i prerë.

Albert Nushi: Po ku je o?

Alizoti: Po ku më latë atë natë ore po të them.

Albert Nushi: Po unë jam në Fier ore.

Alizoti: Fol me shefin e madh. E kupton vetë ti, se s’dua ta them.

Albert Nushi: Kë do?

Alizoti: Shefin e madh.

Albert Nushi: Dëgjo tani, me kujdes. Nesër në orën 9 më bëj telefon.

Alizoti: Më erdhën 2 telefonata mua nga krahu tjetër.

Alizoti: Një sekondë, do t’i thuash shefit të më takojë mua sot se s’bën…

Albert Nushi: Shefi është jashtë, i ka deleguar kompetencat një tjetri.

Alizoti: Në ç’vend është?

Albert Nushi: Shefi është jashtë. Ka shumë mundësi që nesër pasdite të jetë këtu.

Alizoti: Nesër dmth do të marr unë ato (qesh)?

Albert Nushi: Dëgjo ore dëgjo, nesër…

“E gjithë sajesa në lidhje me gjyqin për kallëzimin e pabërëe është depozituar në gjykatë për arsye që të shmanget nga kallëzimi i ri vëllai i ministrit të Brendshëm të kohës. Gjyqtari i çështjes i cili është tërhequr në gjykime të tjera të mëparshme për shkak se njihte avokatin tim dhe ka deklaruar se ka konflikt interesi, më pas i ka ikur konflikti i interesit dhe më pas ka marrë përsipër të bëjë një gjë të pamendueshme që nuk është në funksion të ligjit”, tha Salianji. 

Po ju lexoj një pjesë të përgjimeve të Prokurorisë së Torinos: Artan Gjermeni në shërbim të bandës kriminale të Lushnjes. Denoncimi ka ardhur nga të dhënat e ardhura nga provat e dosjeve gjyqësore që tregojnë loidhjen e drejtpërdrejtë të funksioinarit në fjalë me eksponentët kryesorë të bandës kriminale. Gjermeni është i kapur, nga transkriptet e bisedave në Sky ku bëhet fjalë për favorizim të grupeve kriminale, për ndërhyrje në short… Ka përgjime zyrtare, disponohen nga Prokuroria“, theksoi Salianji.