'Perlat' e dosjes 500 faqëshe të SPAK

Dosja prej 500 faqesh e përgatitur nga SPAK kundër kryetarit të Partisë Demokratike, Sali Berishës dhe dhëndrit të tij Jamarbër Malltezi përmban akuzat për korrupsion dhe pastrim parash, kryesisht të lidhura me privatizimin e ish-kompleksit "Partizani".

Hetimi përfshin edhe pasuritë e tjera të Malltezit dhe gruas së tij, Argita Berisha Malltezi, përfshirë apartamente dhe llogari bankare, të cilat janë sekuestruar.

SPAK thekson se Berisha mbante një imazh të pastër publikisht, ndërsa përfitimet materiale kalonin përmes vajzës dhe dhëndrit të tij.

Për këto deklarata ka reaguar dhe Berisha i cili në konferencën e zhvilluar 'online' me gazetarët është shprehur se sa i përket raportimeve nga dosja hetimore, janë falsifikime, duke akuzuar për fshehje të dokumenteve zyrtare.

Ai tha se Struktura e Posaçme kundër Korrupsionit dhe Krimit të Organizuar është mobilizuar me urdhër dhe porosi të Ramës, për të fajësuar Berishën.

Kryedemokrati denoncoi se SPAK kërkon t’ia veshë fajin e 2013-ës, liderit të opozitës, edhe pse firma për ndryshimin e zonës nga sportive në zonë banimi, sipas tij, është e Edi Ramës.

"Këta falsifikatorë dhe mashtrues shkruajnë se me datë 22.05.2006, pala pronare e përfaqësuar nga Jamarbër Malltezi lidhi kontrate me kompaninë Kontakt ku kompania mori përsipër ndërrimin e destinacionit. Sipas Skapit, kjo u realizua nga miratimi në KRTRSH e Republikës 6 muaj më pas, më datën 21.11.2006 me firmën e Sali Berishës.

Por çfarë fshehin këto qenie mjerane për vitin 2006, që janë të gatshëm të pështyjnë mbi surratin e vet? FSHEHIN dokumentin zyrtar që fakton se ky ndryshim destinacioni ishte vendosur me 12.05.2006 me vendim të Këshillit Teknik të KRRT, i cili përbëhej nga 10 drejtorë të Edi Ramës dhe ajo që ishte më e veçanta e këtij vendi, ishte se ai është marrë pas asnjë kërkese të pronarëve të tokës dhe të institucioneve që administronin klubin Partizani. Ky vendim është marrë 10 ditë përpara se pronaret e tokës të lidhnin kontratë me kompaninë e ndërtimit.

Mbi bazën e këtij ndryshimi destinacioni, Edi Rama përmes Këshillit Teknik të Bashkisë përcaktonte se cila çështje hynte në rendin e ditës të KRRT. Pra, destinacionin e ndryshoi Edi Rama me datën 12.5.2006 në Këshillin Tektik të Bashkisë së Tiranës dhe pastaj 10 ditë më vonë në Këshillin e Rregullimit të Territorit, të kryesuar jo nga Sali Berisha, por nga Edi Rama."-shprehet Berisha.

Mirëpo perlat e SPAK, nuk kanë të mbaruar duke traguar dhe njëherë tjetër se janë në varësinë e kryeministrit Edi Rama.

Së fundmi, Jamarbër Malltezi ka ndarë në llogarinë e tij në Facebook, disa pjesë të dosjes ku duket qartazi mashtrimet dhe zmadhimi jashtë optikës.

“Afërmendsh gjykatat vendosin siç kërkojmë ne” - ja prova. Shkruajne ne akt-padi qe ka mbaruar gjykimi se ia japin me flashdisk te gatshme gjykatës. Mashtrimet e prokuroreve shërbëtore te Edi Ramës janë në çdo faqe. Bolino bën propagande me mashtrimet e shërbëtoreve të Rames”, shkruan krah dokumenteve Malltezi.

DOKUMENTI 1:

“392.5. Në vijim, pas shtimit të pasurisë së paluajtshme, konstatohet se një pjesë e rëndësishme e të ardhurave të shtetasve Malltezi, derivon nga dhënia me qera e këtyre pasurive.

Si qeramarrës evidentohen ndër të tjerë shoqëria Irene Acqua Gas Albanian Branch. Kjo shoqëri me NIPT K71808002H e regjistruar më datë 22.05.2007, sipas raportit të auditimit të depozituar në QKB, rezulton se është degë e shoqërisë italiane Iren Acqua Gas s.p.a. Në fund të vitit 2009, ka marrë në dorëzim projekte në Golem e Tiranë lidhur me shërbimet e integruara të ujit dhe të shpërndarjes së gazit. Në vitin 2010 është angazhuar më një projekt të tretë në Bovillë. Projekti i Tiranës dhe Bovillës ka përfunduar në vitin 2013 ndërsa projekti i Golemit do të përfundojë në tre mujorin e parë të vitit 2014.

Konkretisht në ILDKPK është dorëzuar një kontratë qeraje e datës 01.01.2012 lidhur mes shtetases Argita Malltezi dhe Raimondo Chiodi menaxher i përgjithshëm i shoqërisë Iren Acqua Gas, Dega Shqipëri, i lindur në Libi, për dhënien me qera të pasurisë ap 12/5 me sip 120.5 m2 pranë ETC-së, në shumën prej 8 000 euro në muaj.”

Vet Malltezi shkruan se kjo sipërfaqje është lënë me qera për vlerën 800 €/muaj, ndërkohë në perlat e SPAK figuron si 8,000€ ne muaj.

DOKUMENTI 2

“95.3.1. Për vitin 2012 (deklarata datë 29.03.2013) shtetësja Argita Malltezi deklaron: Shitja e një garazhi në rrugën Lidhja e Prizrenit në vlerën 45 424 euro... - Të ardhura nga shitja e pronës së patundshme në rrugën Lidhja e Prizrenit në vlerën 55 424 euro. Tek të dhënat konfidenciale ka deklaruar (kontratë për shitje prone të patundshme për një vlerë prej 45 424 euro dhe një pagesë e prapambetur prej 10 000 euro pas shitjes së një apartamenti ndaj të njëjtit blerës, pagesë që sipas kontratës së mëparshme, do paguhej vetëm pas regjitrimit të pronës në ZRPP) (nr. 118 rep nr. 35 kol datë 20.02.2012).

395.4. Gjithashtu, konstatohet se shtetësja Argita Malltezi, pavarësisht se rezulton të ketë shitur apartamentin dhe shtesën në vitin 2008, ka vijuar të deklarojë përfitim qeraje për pasuri të ndodhura në rrugën Lidhja e Prizrenit.

Për vitin 2008, në deklaratën periodike vjetore shtetasja Argita Malltezi deklaron Qera:...Nga dhënia me qera e një apartamenti Rr. Lidhja e Prizrenit 1170 euro/muaj neto, për 4 muaj. Edhe në DVIP për vitin 2009, kjo shtetase deklaron: "...nga dhënia me qera e një apartamenti Rr. Lidhja e Prizrenit 1170 euro/muaj neto X 12 muaj”.

Ndërsa rreth kësaj Jamarbër Malltezi shkruan se apartamenti që merret me qera është tjetër dhe vijon të jetë e sot me qera. Mesa duket SPAK, si ka bërë mirë llogaritë.

DOKUMENTI 3

“kthimit të plotë të territoreve, privatizimin e objekteve të ndodhura në të, ndryshimin destinacionit të zonës sportive në zonë banimi, që do të sillte një zhvillim ndërtimi t konsiderueshëm dhe në këtë mënyrë fitim të madh.

 I vetmi që kishte pushtetin e mjaftueshëm për të kontrolluar të gjithë sektorët ku mund të realizoheshin këto objektiva, ishte shtetasi Sal Berisha. Kontaktet për arritjen e këtij qëllimi, dokumentohen të jenë realizuar mes dhëndrrit te këtij të fundit, shtetasit Jamarbër Malltezi dhe shtetasit Fatmir Bektashi.

Shtetasi Sali Berisha nga leximi në tërësi i provave të administruara përgjatë gjykimit, rezulton të ketë marrë përsipër përmbushjen e kërkesave, duke pranuar shpërblimin/mitën që në vijim kalon në bashkësinë ligjore të familjes së vajzës së tij, shtetases Argita Malltezi, nëpërmjet shtetasit Jamarbër Malltezi.

Me shkresën e dt. 23.11.2022 drejtuar Studio Pustinës, shtetasi Xhimi Begeja i pakënaqur kur janë ndarë përfitimet, është shprehur: "... Ju besova verbërisht sepse Gita dhe Abi më garantuan qysh nga dita e parë ku studio e juaj të jetë garantusja ligjore dhe financiare në...”

Teksa cështja është ende në hetim, në dosjen voluminoze të SPAK, cështja ka përfunduar. “Ende ne hetim por shërbëtoret e Edi Ramës shkruajnë në akuze qe u krye gjykimi”, shkruan Malltezi.

Kujtojmë që për situatën ka reaguar dhe vajza e Berishës, Argita Malltezi e cila ka thënë se nëse GJKKO do t'i dënojë, çështjen do ta ndjekë në çdo hap të gjyqësorit, deri në Strasburg.

“Ne kemi kundërshtuar dhe do të kundërshtojmë në rrugë gjyqësore çdo akt të drejtësisë, ndërkohë që jam para medias për të bërë një betejë tjetër, atë mediatike dhe të shpjegimit të kësaj çështje te shqiptarët. Thash që në fillim, se nuk ka dekoratë më të bukur se kjo për Berishën”.

E pyetur nëse do ta pranojnë vendimin e Gjykatës së Posaçme, Argita Berisha Malltezi deklaroi se kjo gjë nuk do të ndodhë.

“Sigurisht që jo, nuk mund të pranosh fajësi kur nuk ka prova. Do të vazhdojmë të gjitha hapat që ka gjyqësori. Pa diskutim, do shkojmë edhe në Strasburg”, theksoi ajo.