Teliti: Rikthimi i taksës së sheshtë dhe lufta kundër PPP-ve korruptive, prioritetet e Qeverisë së PD

Koordinatori për Programin Ekonomik në PD, Dorjan Teliti, ka shpërndarë detaje mbi një nga shtyllat kryesore të programit ekonomik 2025-2029, që fokusohet te qeverisja e vogël dhe rikthimi i taksës së sheshtë, eficencës dhe ligjshmërisë në përdorimin e parasë publike.

Teliti thekson se do të rikthehet taksa e sheshtë prej 10% mbi të ardhurat dhe fitimin, duke eliminuar lehtësitë fiskale klienteliste dhe korruptive që favorizojnë miqtë e qeverisë dhe oligarkët. Ai ka paralajmëruar gjithashtu pezullimin e menjëhershëm të pagesave dhe anullimin e koncesioneve PPP që konsiderohen korruptive dhe klienteliste, duke filluar me projektet e inceneratorëve dhe sterilizimit.

Një tjetër pikë e rëndësishme është heqja me ligj e të drejtës për miratimin e çdo PPP të pakërkuar, futja e një gare të detyrueshme me të paktën tre ofertues për prokurimet publike dhe monitorimi rigoroz i zbatimit të çdo kontrate publike.

Teliti ka shtuar se këto masa do të realizohen brenda 100 ditëve të para të Qeverisë së PD, me kryeministër Sali Berishën.

Postimi nga Dorian Teliti

QEVERISJA E VOGËL DHE TAKSA TË ULTA, REALITET ME BERISHËN KRYEMINISTËR!

1. Anullimi i taksimit vrastar progresiv dhe rikthimi i taksës së sheshtë 10% mbi të ardhurat dhe fitimin,

2. Anullimi i cdo lehtësie fiskale klienteliste dhe korruptive ndaj miqve te oborrit dhe oligarkëve,

3. Thjeshtimi procedurave burokratike duke i thënë mjaft “taksimeve të fshehta” dhe rikthimi drejt parimeve të konkurrencës së lirë e të ndershme për secilin sipërmarrës në treg,

4. Largimi “ceremonial” i patronazhistëve nga administrata publike, ulja e ndjeshme e shpenzimeve operative dhe eliminimi i shpenzimeve të luksit,

5. Pezullimi i menjëhershëm i pagesave dhe më pas edhe anullimi me vendim gjykate i koncesioneve PPP korruptive dhe klienteliste, duke filluar me inceneratorët dhe sterilizimin,

6. Heqja me ligj e të drejtës për të miratuar cdo PPP të pakërkuar,

7. Futja e garës në prokurimet publike me të paktën 3 ofertues dhe monitorim rigoroz i zbatimit të cdo kontrate publike,

8. E sidomos implementimi i një MODELI TË RI TË SHPËRNDARJES SI TË TË ARDHURAVE ASHTU EDHE TË SHPENZIMEVE PUBLIKE, ku fokus do marrin shtresat me të ardhura të ulta (minimumi jetik dhe rritja reale e pensioneve), sipërmarrja e ndershme shqiptare dhe krijimi i kushteve për thithjen e investimeve të huaja.