Dy betejat e reja që prodhoi 25 prilli. PS sfidon për herë të dytë Metën, PD zgjedh mes debatesh kryetarin e ri   

25 prilli u cilësua një ditë e qetë dhe normale zgjedhjesh të përgjithshme. Me rezultatin e certifikuar jo vetëm nga KQZ, por edhe nga ndërkombëtarët, PS fitoi me 74 mandate, PD mori 59 deputetë, LSI humbi shumë ulëse në krahasim me 2017-ën, duke marrë vetëm katër deputetë, ndërsa surpriza e këtij procesi ishte PSD e Tom Doshit, i cili arriti të marrë tre deputetë.

Post 25 prilli solli zhvillime të reja në arenën politike në vend.

PS, ashtu siç kishte paralajmëruar në fushatë, nisi menjëherë procedurat për shkarkimin e presidentit Ilir Meta, për shkelje të rënda përpara dhe gjatë fushatës zgjedhore, ndërsa PD ka nisur parakohe procesin për zgjedhjen e kryetarit të ri të PD.

Nisma e PS, shkarkimi i Metës për herë të dytë brenda dy vitesh

Fill pas përfundimit të zgjedhjeve, një grup deputetësh të Partisë Socialiste i kërkuan parlamentit shkarkimin e Presidentit, për shkak të shkeljeve, që sipas tyre, ai i bëri Kushtetutës para dhe gjatë fushatës zgjedhore të 25 prillit, ndonëse mandati i rregullt i tij përfundon në korrik të vitit të ardhshëm.

Meta reagoi menjëherë për këtë nismë, duke e quajtur një “shashkë”, që synon të shmangë hetimin e krimeve zgjedhore. Ai theksoi se “asgjë nuk ka përfunduar” dhe është detyrë e gjithë subjekteve politike ta ndjekin procesin zgjedhor deri në fund.  

Një propozim për të shkarkuar Presidentin nevojitet të miratohet me dy të tretat e votave në parlament. Më pas, vendimi i shkon Gjykatës Kushtetuese, e cila ka fjalën e fundit për shkarkimin e presidentit.

Ende nuk është e qartë nëse parlamenti aktual, të cilin zoti Meta e quan si antikushtetues për shkak të mandateve të djegura dhe moszëvendësimit të plotë të tyre, i ka apo jo votat e mjaftueshme për shkarkimin e tij.

Po ashtu mbetet për t’u parë nëse dy muajt e mbetur deri në fillim të korrikut do t’i mjaftojnë këtij parlamenti për të ndjekur gjithë procedurat e parashikuara për shkarkim.

Kjo është hera e dytë që shumica socialiste hap procedurat për shkarkimin e presidentit.

Përpjekja e parë u bë në vitin 2019, për shkak të dy vendimeve të presidentit, fillimisht për shtyrjen e datës së zgjedhjeve vendore të qershorit dhe më pas, në nëntor të po atij viti, pas përplasjeve mbi emërimet në Gjykatën Kushtetuese.

Në korrik të vitit 2020, komisioni hetimor parlamentar i kontrolluar nga socialistët, pasi priti edhe opinion e Komisionit të Venecias, arriti në përfundimin se presidenti Meta kishte tejkaluar kompetencat, por shkeljet nuk ishin të asaj shkalle sa të justifikonin shkarkimin e tij.

Mes debateve, PD hap parakohe garën për kryetarin e ri

Rezultati i 25 prillit nuk u njoh nga PD, duke e cilësuar atë si masakër elektorale. Partia Demokratike ka pretenduar se votat e qytetarëve janë tjetërsuar, ndërsa ka theksuar se do të faktojë një gjë të tillë.

Më herët PD ashtu si edhe LSI i kanë kërkuar KQZ pamjet filmike nga numërimi i votave.

Megjithatë, rezultati ka sjellë edhe reagimin e një pjesë të demokratëve të cilët pas zhgënjimit nga humbja e Partisë Demokratike në zgjedhjet e 25 prillit 2021, kanë kërkuar dorëheqjen e Lulzim Bashës nga drejtimi i PD. 

I pari që e kërkoi ishte anëtari i Kryesisë së PD-së, Fatbardh Kadilli, i cili shpalli kandidaturën për kryetar, më pas ish presidenti dhe kreu i Këshillit Kombëtar, Bujar Nishani.

Edhe ish drejtues dhe anëtarë të Kryesisë, të Këshillit Kombëtar janë shprehur se Basha është përgjegjësi i vetëm për humbjen e zgjedhjeve.

Bëhet fjalë për Edith Harxhi, Endira Bushati, Bujar Nishani, Ibsen Elezi, Bislim Ahmetaj, Arben Imami, Arben Ristani, Edvin Kulluri, Pirro Ahmetaj dhe Endrit Hoxha dolën pak ditrë më parë në një deklaratë se Lulzim Basha ka dëmtuar opozitarizmin në vend duke e lënë atë në dorën e Ramës. 

Të dielën që lamë pas, Partia Demokratike vendosi të hapë garën për kreun e ri dhe zhvillimin e votimit sipas parimit një anëtar një votë, në 13 Qershor. Vendimi afron me pak më shumë se një muaj, këtë proces, i cili sipas statutit do të duhej të zhvillohej në muajin korrik.   

Ndërkohë, mbrëmë në Euroneës, Imami deklaroi se këto ditë do të bëjnë të ditur emrin e kandidatit për kryetar që do të përfaqësohë këtë grupim të quajtur ‘Për PD-në’.

Deri më 22 Maj, do të jetë periudha e paraqitjes së kërkesave për kandidim, dhe më pas një periudhë 18 ditore nga 24 Maji deri në 11 Qershor, për fushatë në të gjitha strukturat.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm