Politikë në kulmin e pandemisë/ Qëndrimet publike të Najada Çomos në favor të qeverisë para ftesës për deputete

Najada Çomo, Shefja e Shërbimit Infektiv ka vendosur t’i futet politikës zyrtarisht.

Në ditët e vështira të pandemisë, e ndërsa shifrat e viktimave nga Covid-19 prej ditësh shkojnë mesatarisht 20, “komandantja” e vijës së zjarrit, siç e cilësoi kryeministri Edi Rama, iu përgjigj pozitivisht ftesës së këtij të fundit për të kandiduar si deputete në zgjedhjet e 25 prillit nën siglën e PS.

Ky vendim ka ngjallur mjaft debate dhe reagime gjatë ditës së sotme. Kolegët e saj e kanë cilësuar një lajm të mirë për politikën, por të keq për spitalet e tejmbushur tashmë nga fluksi i pacientëve me Covid-19.

Përfshirja zyrtare e Comos në politikë, e krah PS duket se nuk ishte edhe aq surprizuese. Kjo për faktin se përgjatë një viti që Shqipëria po përballet me pandeminë, shefja e Infektivit ka qenë ndër mjekët më aktivë që në qëndrimet e saj publike përkrahte politikat e qeverisë.

Po ashtu, jo rrallë, doktoresha dedikonte reagime specifike edhe në përgjigje të akuzave të opozitës për keqmenaxhim të pandemisë.

Më poshtëm rendisim disa prej qëndrimeve të mjekes

“Janë fshehur 600 viktima”

Disa muaj më parë, kreu i PD bëri një deklaratë të fortë ku sipas tij, ishin fshehur mbi 600 viktima të Covid-19 nga qeveria.

Një ditë pas akuzave  shefja e Spitalit Infektiv Najada Çomo del në një deklaratë për mediat dhe i konsideron deklaratat e Bashës si goditje ndaj punës së tyre.

“Shprehim publikisht habinë për akuzat e bërë nga Basha dje në një emision televiziv. Janë akuza tronditëse që vënë në goditje profesionalizimin tonë si mjekë por dhe janë goditje të befasishme të përpjekjeve tona në luftën kundër covid.Përballë akuzash të tilla e shohim të domosdoshme të informojmë publikun se, nuk është kurrsesi e vërtetë që janë fshehur vdekje nga covid, është praktikisht e pamundur, pasi çdo pacient që ndërron jetë përcillet për në morg bashkë me kartelën shoqëruese që përmban dhe arsyen e vdekjes , e cila është firmosur dhe vulosur me përgjegjësi profesionale dhe ligjore nga mjeku që e ka trajtuar deri në momentin e fundit”, thotë mjekja Najada Çomo.

Mjekja Çomo vijon deklaratën duke thënë se janë të gatshëm ndaj hetimeve për çdo kartelë mjekësore. Ajo thote se  nëse akuza përsëritet do ftojnë organet kompetente të hetojnë dhe bëjnë verifikimin e çdo kartele mjekësore.

“Pacientët e blejnë Remdisivirin”

Sërish Çomo i përgjigjet  akuzave të kreut të PD në aktivitetin e kryetarit të PD-së, Lulzim Basha me Urdhrin e Farmacistit se pacientët e blejnë ilacin Remdisiviri.

Përmes një statusi në ‘Facebook’ Çomo theksonte se në çdo orë të ditës janë në krye të detyrës dhe se medikamenti Remdisivir i cili përdore për terapitë e mjekut, është falas.

Postimi i plotë:

Ne jemi çdo ditë, çdo orë në krye të detyres dhe pacientet tane e dine me mire se askush kete gje.

Po përdorim terapitë e mjekimit, si kudo në botë që janë falas per pacientet. Edhe Remdesivirin, e kemi dhe e perdorim ne paciente specifike, sipas protokolleve boterore.

Te thuash qe Remdesiviri blihet nga pacientet tane eshte jo vetem genjeshter, por lendon perpjekjet e nje ekipi mjekesh dhe infermieresh qe prej 8 muajsh jane pa gjume ne sy me perkushtimin maksimal per te shpetuar jete.

Ju premtoj te nderuar qytetare qe do jemi per ju, per tju sherbyer deri ne fund!

Ju na ndihmoni duke respektuar rregullat e higjienes, maskes, distancimit!”, shkruan Como në 4 nëntor të vitit të shkuar.

Denoncimi për ambulancat

Në nëntor, Kryeministri Edi Rama pati publikuar në Facebook pamje nga brenda Spitalit Infektiv, ku ishin të shtruar pacientë të infektuar me koronavirus.

Shefja e Shërbimit Infektiv, Najada Çomo, ndërsa foli për gjendjen në Spitalin Infektiv, u shpreh se kapacitetet nuk ishin ezauruar.

Në lidhje me denoncimet e opozitës për pacientë që mjekohen nëpër ambulanca, Çomo u shpreh asokohe se nuk kishte nga ata që presin në ambulancë me orë të tëra, duke sqaruar se ndodh të vijnë më shumë se një pacient në një moment dhe se duhen disa minuta për të bërë një koordinim.

“Kapaciteti nuk është ezauruar, kemi kapacitete për t’i pritur ata persona që kanë nevojë për kujdes spitalor. Ardhja e një ambulance shoqërohet me një pacient dhe ndodh kombinimi që kur pacienti do vijë në spital, ne njoftohemi dhe në situata të veçanta mund të kemi prurje të menjëhershme dhe do bëhet një lloj koordinimi dhe ndonjëherë pacienti nuk ka kritere për të hyrë brenda dhe ambulancat që janë jashtë, një pjesë prej tyre presin pacientët që do të dalin nga spitali për ta dërguar në vendin ku ai banon. Jo çdo ambulancë që është jashtë, është nj pacient që pret me orë të tëra dhe nuk ka pacientë që presin me orë të tëra për t’u shtruar në spital”, u shpreh mjekja.

“Vetëvrasjet në spitalet Covid, nuk ka psikologë”

Shefja e Spitalit Infektiv, profesoresha Najada Çomo në mediat televizive u bë pjesë e replikave pas akuzave lidhur me vetëvrasjet e pacientëve në spitalet Covid.

Në atë kohë, u ngritën akuza se mungonin se mungonte shërbimi i psikologëve në këto spitale për pacientët, ndërsa Çomo tha se ndodh për shkak të situatës së rënduar psikologjike të pacientëve.

Sipas saj, çdo pacient i infektuar nga Covid, është i rrezikuar të preket nga çrregullimet psikologjike, kjo situatë rëndohet edhe nga fakti se kur hyn në spital, i sëmuri, përballet me frikën por edhe me mungesën e kontaktit fizik me familjarët gjatë kohës së shtrimit, edhe pse kontakti përmes telefonatave me ta, nuk mungon.

"Mos hidhni baltë mbi punën tonë”

Në muajin korrik, Como publikoi pamje nga spitali teksa u përgjigjej akuzave se të shtruarit nuk ishin të sëmurë me Covid por se kishin probleme të tjera shëndetësore.

Në një video të publikuar në Facebook ku tregonte aspekte nga puna, Como thoshte:

"Sic e shikoni është një grup i madh doktorësh që janë në krye të detyrës dhe thirrja jonë është që kur shikoni kaq shumë persona, edhe në moshë të re të shtruar në terapinë intensive kuptoni që ka shumë pacientë të shtruar në shërbimin infektiv.

Kjo që po shikoni është një realitet jo gënjeshtër dhe të gjithë njerëzit janë në krye të detyrës sikurse shikoni shumë reanimagtorë dhe i gjithë stafi që është duke shërbyer tek pacientët.

Mos të hedhim baltë mbi punën që bëhet dhe realitetin që është shërbimit infektiv”.