Rrugëtimi i Bashës në politikë, goditja që e rrëzoi si drejtues të PD

Lulzim Basha dha sot dorëheqjen nga drejtimi i forcës kryesore politike të së djathtës.

Basha udhëhoqi PD-në prej gati 9 vitesh, duke pasuar në këtë detyrë, Sali Berishën, i cili u largua pas humbjes së zgjedhjeve të vitit 2013.

Që prej marrjes së drejtimit të PD, Basha humbi jo pak por gjashtë pale zgjedhje radhazi, e megjithatë, ai vazhdoi të qëndrojë në pozita drejtuese, por goditjen finale ai e mori pjesa zgjedhjeve të pjesshme të 6 marsit, ku PD nga 6 në 5 bashki u rendit për herë të parë forcë e tretë.

Krisja e parë startoi 6 muaj më parë, kur nisi edhe perplasja e madhe në PD, për shkak se Basha përjashtoi ish kryeministrin dhe ish liderin e PD Sali Berisha nga grupi parlamentare me shpalljen e tij ‘non grata’ nga SHBA.

Duket se ky konflikt shënoi fillimin e fundit të tij në krye të një partie, që u përça dhe u dobësua nga lufta e brendshme, pasi Berisha ndonëse 77 vjeç vuri në lëvizje në bazën e partisë, duke tërhequr pas vetes mbështetësit e tij, jo vetëm në degët e partisë por dhe nga radhët e deputetëve.

Në dhjetor, ai thirri një kuvend të demokratëve, në të cilin u votua shkarkimi i Bashës, vendim për të cilin u organizua dhe një referendum.
Lëvizjet e ish kryeministrit nuk u njohën nga Basha, i cili po ashtu thirri një tjetër kuvend të demokratëve, duke ju kundërvënë zotit Berisha.

Përplasjet mes palëve u përshkallëzuan, aq sa në 8 janar Berisha dhe përkrahësit e tij tentuan të marrin me forcë selinë e partisë.

Ndërkohë, humbja e zgjedhjeve të fundit të pjesshme lokale të 6 marsit nuk u kapërdi më nga demokratët, madje as nga mbështetësit më të besuar të Lulzim Bashës, të cilët hapur i dolën kundër dhe i kërkuan dorëheqjen nga posti që mban.

Sot, Basha i braktisur prej të gjithëve dha dorëheqjen.  

Rrugëtimi politik i Bashës

Lulzim Basha hyri në skenën politike shqiptare në vitin 2005 si një fytyrë e re për Partinë Demokratike, pjesë e një platforme politike të krijuar nga Sali Berisha të quajtur “Komiteti për Orientimin e Politikave”. Basha, 48 vjeç, u bë ministër i Transporteve në vitin 2005 dhe u vu nën ndjekje penale për kontratën e ndërtimit të një autostrade 60 kilometra të gjatë të njohur si Rruga e Kombit, me konsorciumin amerikan dhe turk Bechtel Enka. Gjykata e Lartë e Shqipërisë i mbylli hetimet për shkak të skadimit të afateve hetimore.

Basha u bë Ministër i Brendshëm në vitin 2009 ndërsa fitoi mes debateve zgjedhjet për kryetar bashkie të Tiranës në vitin 2011. Në vitin 2013, pas dorëheqjes së Sali Berishës nga posti i kryetarit të partisë, Basha u zgjodh kryetar, pozicion që u ripërtërit në vitin 2017 dhe në qershor 2021, pavarësisht humbjeve elektorale në këto dy vite.

Në shtator 2021, Basha vendosi të përjashtojë ish-kryetarin Berisha nga grupi parlamentar për shkak të shpalljes së këtij të fundit nga Shtetet e Bashkuara si person i përfshirë në korrupsion madhor.