'Simbolikë’ apo politikë e brendshme? Vizita në Ukrainë e Scholz, Macron dhe Draghi/ E SHPJEGUAR

Oliver Noyan/Euroactiv

Liderët e Gjermanisë, Francës dhe Italisë udhëtuan drejt kryeqytetit ukrainas sot (16 qershor) për të zotuar mbështetjen për vendin e shkatërruar nga lufta në një përpjekje për të shuar pakënaqësinë në rritje për mbështetjen e tyre joentuziaste.

Megjithatë, analistët paralajmërojnë se vizita, e cila ndodh ndërsa Brukseli përgatitet për të dhënë verdiktin për kandidaturën e Kievit për në BE, lidhet me politikat e brendshme dhe nuk ka gjasa të ndryshojë thelbin e politikave të Berlinit, Parisit dhe Romës ndaj Ukrainës.

Olaf Scholz, Emmanuel Macron dhe Mario Draghi, sipas burimeve të shumta po shkojnë në Kiev për të diskutuar ofertën e anëtarësimit të Ukrainës në BE dhe mbështetjen e mëtejshme financiare dhe ushtarake.

Gjermania dhe Franca janë kritikuar gjithnjë e më shumë javët e fundit, pasi disa zyrtarë ukrainas thanë se dy vendet më të mëdha anëtare të BE-së nuk po bëjnë sa duhet për të mbështetur përpjekjet e Kievit për të shmangur pushtimin rus dhe janë shumë ngurrues për të ndërprerë lidhjet me Rusinë.

Presidenti ukrainas Volodymyr Zelenskyy tashmë ka theksuar për ZDF-në të marten se “asnjë akt balancues nuk duhet të tentohet mes Ukrainës dhe marrëdhënieve me Rusinë."

Megjithatë, ndërsa tre krerët e shteteve po përpiqen të tregojnë mbështetjen e tyre të palëkundur për Ukrainën, vizita nuk ka gjasa të shënojë një ndryshim kursi.

“Mendoj se është më shumë një formë e politikës simbolike që tre krerët e shteteve që janë më të kujdesshëm dhe më hezitues për sa i përket dërgesave të armëve dhe marrëdhënieve me Rusinë, tani po udhëtojnë drejt Ukrainës”, tha Stefan Meister për EURACTIV, shefi i programit për 'Rendin Ndërkombëtar dhe Demokracinë në Këshillin gjerman të Marrëdhënieve me Jashtë'.

Koha e vizitës nuk është rastësi, pasi Komisioni Evropian do të njoftojë nëse do të propozojë t'i japë Ukrainës statusin e kandidatit për në BE të premten.

Megjithatë, ka edhe arsye të brendshme për vizitën. Presioni ka qenë veçanërisht në rritje mbi Scholz-in, i cili më parë refuzoi të udhëtonte në Ukrainë pasi nuk dëshiron të shkojë "për të hyrë dhe dalë shpejt me një shkrepje fotoje", tha ai në maj.

Megjithatë, që atëherë ai është gjendur gjithnjë e më shumë në mes të trysnisë, pasi nuk arriti t'i dorëzonte Ukrainës armatimin e rëndë që premtoi një muaj më parë dhe është kritikuar gjithnjë e më shumë nga zyrtarët ukrainas për hezitimin.

Në Francë, nga ana tjetër, vizita vjen vetëm disa ditë para raundit të dytë të zgjedhjeve legjislative të dielën, ku Macron synon të mbrojë shumicën në Asamblenë kombëtare kundër aleancës së majtë NUPES e cila arriti të mbledhë mbështetje në rritje javët e fundit.

Duke inkurajuar bisedimet e paqes?

Ndërsa perspektiva e mbështetjes shtesë financiare dhe ushtarake dhe statusi i kandidatit në BE i Ukrainës është vendosur në krye të axhendës, ka shumë të ngjarë që liderët e vendeve më të mëdha të BE-së të diskutojnë gjithashtu bisedimet e mundshme të paqes me Rusinë.

Macron ka qenë veçanërisht i hapur për këtë çështje. Në fillim të qershorit, ai theksoi se Perëndimi "nuk duhet të poshtërojë Rusinë", duke shkaktuar kështu kritika të gjera në Ukrainë.

Macron e përsëriti këtë qëndrim të mërkurën gjatë një vizite në Rumani dhe Moldavi, ku theksoi se “Presidenti ukrainas dhe zyrtarët e tij do të duhet të negociojnë me Rusinë”.

Ndërsa Scholz është përmbajtur nga nxitja publike për bisedimet e paqes, eksperti rus Stefan Meister tha se Franca dhe Gjermania kanë "pozicione të ngjashme për këtë çështje".

"Unë mendoj se vizita do të jetë gjithashtu për të eksploruar atë që është e mundur në aspektin e një armëpushimi dhe ku pozicionohet Ukraina ne kete pike," tha Meister.

Pulsi rreh për 'paqe' apo 'drejtësi'?

Ndërkohë, sondazhet e reja të publikuara nga Këshilli Evropian për Marrëdhëniet me Jashtë (ECFR) të mërkurën mund të tregojnë se liderët gjermanë dhe francezë kanë një gisht të fortë në pulsin e audiencës së tyre të brendshme.

Në të gjitha vendet e anketuara, përveç Polonisë dhe Britanisë së Madhe, një kamp mbizotërues "i paqes" i votuesve evropianë (35%) dëshiron t'i japë fund luftës sa më shpejt të jetë e mundur, ndërsa vetëm 22% besojnë se vetëm humbja e qartë e Rusisë mund të sjellë paqe.

Këto shifra janë edhe më të larta në Itali, Gjermani dhe Francë, ku respektivisht 52%, 49% dhe 41% e të anketuarve duan paqe tani, edhe me koston e lëshimeve të Ukrainës ndaj Rusisë.

Vetëm 16%, 19% dhe 20% besojnë se vetëm disfata e Rusisë mund të sjellë paqe.

Ndërkohë, Ukraina tashmë ka hedhur poshtë idenë e një plani të mundshëm paqeje të ndërmjetësuar nga Franca dhe Gjermania – siç ishte rasti me marrëveshjet e Minskut që ngrinë konfliktin në Ukrainë në 2014 dhe 2015.

“Kam frikë se ata do të përpiqen të arrijnë një marrëveshje Minsk III”, tha për Bild këshilltari kryesor i Zelensky-t, Oleksiy Arestovych.

“Do të thonë se duhet ta ndalim luftën që po shkakton probleme ushqimore dhe probleme ekonomike”, tha ai.

Për Arestovych, një opsion i tillë është jashtë tryezës. Putin vrau njerëz në Bucha, "dhe Perëndimi thotë se duhet t'i shpëtojmë fytyrën".

*Në shqip nga Politiko.al