Mandati i katërt: Një luks që Shqipëria nuk mund ta përballojë

Nga Hysni Gurra

Edi Rama ka 28 vite në pushtet. Mos e harroni këtë, para se të shkoni te kutia e votimit — nga të cilat 12 vite si kryeministër, një pozicion që i ka dhënë të gjitha mundësitë për të përmirësuar jetën e shqiptarëve dhe ai nuk e ka bërë, përkundrazi.

Mos harroni, Edi Rama është njeriu që ka patur më shumë pushtet se çdo politikan tjetër pas viteve ‘90.

Por çfarë ka bërë ai me pushtetin që i kanë dhënë dhe u ka grabitur, socialistëve së pari, e çdo shqiptari?

Në këto 12 vite, ai zgjodhi të përzërë mbi 1 milion qytetarë jashtë vendit dhe të varfërojë ata që mbetën.

Jo sepse s’i kishte mundësitë, por sepse nuk donte ta përdorte pushtetin për ta ndryshuar realitetin shqiptar.

Një votues socialist, i pavendosur, apo edhe i vendosur për t’ia dhënë votën sërish, mjafton të mendojë vetëm kaq:

Në 12 vite, pati mundësi të rriste pensionet — por nuk i rriti.

Në 12 vite, pati mundësi të përmirësonte shëndetësinë — por ju la pa ilaçe.

Në 12 vite, pati mundësi të investonte në arsim — por ua boshatisi shkollat.

Në 12 vite, pati mundësi të ndihmonte bujqësinë — por e falimentoi.

Në 12 vite, pati mundësi të ndërtonte infrastrukturë — por e shndërroi në skemë fitimi për klientët e vet.

Në 12 vite, pati mundësi të ulte koston e jetesës për shqiptarët — por bëri të kundërtën, vetëm u rriti.

Në 12 vite, pati mundësi të qeveriste me ndershmëri — por pasuroi veten dhe shpuren e tij.

Asnjë nga këto nuk u bë rastësisht. Ishin zgjedhje. Ishin përparësi të vendosura me vetëdije.

Ndaj, çfarë e bën dikë të mendojë se në mandatin e katërt do të ndodhë ndryshe me Edi Ramën?

Shqiptarët i kanë dhënë Ramës gjithçka për gati tri dekada — sidomos në këto 12 vitet e fundit.

Çfarë morën mbrapsht?

U pasurua ai dhe njerëzit pranë tij, ndërsa qytetari i zakonshëm nuk pa as përkujdesje, as ndershmëri, as zhvillim.

Mendoni ftohtë. Largoni etiketat “i majtë”, “i djathtë” apo “i paparti”.

Mendojeni këtë si qytetarë që jetojnë realitetin e përditshëm dhe pyesni:

A ka ndonjë arsye logjike për t’i dhënë sërish votën një njeriu që e ka shkatërruar besimin tri herë radhazi?

Sot Shqipëria ka përballë një opozitë me program që i përgjigjet shumë prej nevojave kryesore të shqiptarëve.

Por edhe sikur të mos kishte program fare, një popull që respekton veten nuk e voton katër herë një dështim të përsëritur.

Një mandat i katërt për këtë qeveri nuk është më një shans — është një luks i rrezikshëm që Shqipëria nuk mund ta përballojë më.