480 miliardë lekë shpenzime për 2022/ Kryeson mbrojtja sociale, qeveria ‘kursen’ për arsimin

‘Open Data Albania’ ka bërë një kërkim mbi shpenzimet qeveritare planifikuar për vitin 2022, sipas klasifikimit funksional, duke marrë në shqyrtim 10 funksione publike të garantuara nga shteti shqiptar.

Bazuar në të dhënat, për vitin 2022 janë planifikuar rreth 480 miliardë lekë për garantimin e këtyre funksioneve, ose 75% e shpenzimeve totale të Buxhetit. Pjesa tjetër janë Shpenzime të Paklasifikuara.

Mbrojtja Sociale është funksioni me mbështetje më të lartë buxhetore. Në 2022 janë planifikuar rreth 182.2 miliardë lekë shpenzime për këtë funksion. Këtu mbulohen nën funksione si Pensione Pleqërie, Pagesa paaftësie, Pagesë Papunësie, Strehim, Përjashtim Social dhe të tjera shpenzime për mbrojtje të grupeve.

Shëndetësia është funksioni i dytë me shpenzimet më të larta. Rreth 65 miliardë lekë ose 10.2% të totalit të shpenzimeve buxhetore janë planifikuar për ofrimin e shërbimeve nën këtë funksion. Këtu përfshihen: shërbimi spitalor; shëndeti publik; shërbimi Përgjithshëm Mjekësor; të ardhura nga Fondi Special për Sigurime Shëndetësore.

Arsimi është funksioni i tretë me shpenzime buxhetore më të larta për vitin 2022. Ato janë planifikuar në masën 48.6 miliardë lekë, ose 7.6% e total shpenzime buxhetore , përfshirë këtu: Arsimin Parashkollor dhe Fillor, Arsimin e Mesëm, Arsimin e Lartë, Kërkim dhe Zhvillim Shkencor. Si një pjesë e rëndësishme e ‘piramidës së shpenzimeve’, për arsimin qeveria ka vendosur të shpenzojë 2.6 të PBB.

Çështjet ekonomike renditet i katërti për të cilën janë planifikuar 46.5 miliardë lekë ose 7.3% të shpenzimeve totale. Këtu përfshihen: Çështjet e Përgjithshme të Punësimit; Bujqësia, Pyjet, Peshkimi dhe Gjuetia; Energjia; Transporti; të tjera si Komunikacioni, Industri, Shfrytëzim Minerar, Industria Përpunuese dhe Ndërtim, Zhvillimi ekonomik.

Shërbimet e përgjithshme publike është funksioni i pestë për peshën më të lartë buxhetore të shpenzimeve të planifikuara. Për vitin 2022 janë planifikuar 43.2 miliardë lekë shpenzime. Për Strehimin dhe komoditetet komunitare , qeveria garanton rreth 5.6% të shpenzimeve totale, ku përfshihen Strehimi dhe Urbanistika, si edhe Sigurimi i Ujit.

Shpenzimet për Rendi dhe siguria publike përbëjnë 5.2% të shpenzimeve totale planifikuar për 2022, ose rreth 33 miliardë lekë që shkojnë për: Policinë, Gjykatat dhe Pushtetin Gjyqësor, Burgjet, Shërbimin kundër zjarrit, emergjencat. Tre funksionet me peshën më të ulët në buxhet janë: Mbrojtja me 3% të shpenzimeve totale Argëtimi, Kultura dhe Çështje Fetare me 0.9%; dhe Mbrojtja e Mjedisit me 0.2% të shpenzimeve totale buxhetore.

Kategoria ‘E paklasifikuar’ përfaqëson rreth 25% e shpenzimeve buxhetore të vitit 2022. Të Paklasifikuara në Funksion janë pagesat për shërbimin e borxhit; kontigjenca për politika pagash dhe pensionesh; fondi rezervë; dhe shpenzimet e pushtetit vendor; dhe fondi i rindërtimit.

Rreth 157.2 miliardë lekë janë planifikuar për shpenzimet të tjera të paklasifikuara, ku konkretisht, shpenzimet e pushtetit vendor shkojnë në 60.3 miliardë Lekë. Po kështu, 51 miliardë lekë janë shpenzime planifikuar për pagesat e shërbimeve borxhi (interesa dhe rezerva). Fondi i Rindërtimit këtë vit është planifikuar 20 miliardë lekë. Fondi Rezervë është planifikuar 2.4 miliardë Lekë përcaktuar.