Berisha i pandehur pak para zgjedhjeve, AP: Cilësohet si presion politik i urdhëruar nga Rama

Ish-kryeministri shqiptar Sali Berisha tha të mërkurën se ai u akuzua zyrtarisht për korrupsion në lidhje me një marrëveshje pronësie, duke e përshkruar masën si të motivuar politikisht.

Në tetor, prokurorët e vunë publikisht nën hetim për dyshimin se kishte shpërdoruar postin e tij për të ndihmuar dhëndrin e tij, Jamarber Malltezi, të privatizonte tokën publike për të ndërtuar 17 pallate banimi në Tiranë.

Berisha, 79 vjeç, i cili drejton Partinë Demokratike të opozitës, ka qenë në arrest shtëpie që nga dhjetori dhe iu ndalua edhe udhëtimi jashtë vendit.

Berisha shkoi të mërkurën në prokurorinë speciale, e njohur si Struktura e Posaçme Kundër Krimit të Organizuar, ku iu tha akuzat ndaj tij për rreth gjysmë ore. Ai tha se u thirr si i pandehur dhe iu dorëzua një dosje provash, rreth 500 faqe, të cilat ai i quajti "gënjeshtra".

Malltezi, i cili është i përfshirë edhe në politikë është thirrur po ashtu për t'u informuar se është akuzuar zyrtarisht për korrupsion.

Në dhjetor Parlamenti i hoqi Berishës imunitetin ligjor.

Ish-kryeministri e ka kritikuar hetimin dhe arrestimin e tij si represion politik të urdhëruar nga kryeministri Edi Rama, kreu i Partisë Socialiste të majtë në pushtet.

“Asgjë nuk ka ndryshuar. Është një vazhdim i një hakmarrjeje politike,” u tha Berisha gazetarëve jashtë prokurorisë, ndërsa hodhi poshtë të gjitha pretendimet për korrupsion.

Aty ishin mbledhur dhjetëra mbështetës, të cilët mbanin parulla në mbështetje të Berishës dhe kritikonin qeverinë.

Berisha shërbeu si kryeministër i Shqipërisë nga 2005-2013 dhe si president nga 1992-1997. Ai u rizgjodh deputet i Partisë Demokratike në zgjedhjet parlamentare të vitit 2021.

Shqipëria mban zgjedhjet parlamentare vitin e ardhshëm. Nëse Berisha është dënuar ose është ende në pritje të gjykimit, ai mund të mos lejohet të kandidojë për detyrë.

Qeveria e Shteteve të Bashkuara në maj 2021 dhe Mbretëria e Bashkuar në korrik 2022 ndaluan Berishën dhe anëtarët e ngushtë të familjes të hynin në vendet e tyre për shkak të përfshirjes së tij të dyshuar në korrupsion. AP