Denoncimet e qytetarëve, Nano mesazh drejtuesve të policisë: Të mos bien në vesh të shurdhër

Drejtori i Përgjithshëm i Policisë së Shtetit, Gledis Nano, iu ka drejtuar një mesazh drejtuesve të policisë në qarqe dhe në departamente.

Në mesazhin e tij, Nano i referohet ankesave, reagimeve të qytetarëve në rrjetet sociale të cilat erdhën pas tragjedisë në Himarë, ku ish-efektivi Arjan Tase goditi për vdekje me skaf një 7-vjeçare.

Nano sjell në vëmendje ankesat e qytetarëve për sjelljen e patrullave dhe apo forcave Shqiponja, dhe Policisë Kufitare. “Punonjës policie që sillen arrogantë me qytetarët, që nuk zbatojnë ligjin por shikojnë interesin e xhepit të tyre; punonjës policie që nuk njohim humanizmin fare po fare, që nuk tolerojnë (brenda ligjit) qytetarët e ndershëm por tolerojnë horrat e trafikantët”, shkruhet në mesazhin e Nanos.

Teksa rendit edhe disa mesazhe të tjera nga qytetarët që kanë mbërritur në adresë të Nanos, drejtori i Përgjithshëm i Policisë e konsideron një situatë alarmante teksa i bën apel drejtuesve që këto mesazhe të mos bien në vesh të shurdhër.

Mesazhi i plotë i drejtorit të policisë

Përshëndetje të nderuar Drejtues

Ditët e fundit, mua si Drejtor i Përgjithshëm më kanë ardhur shumë komente të qytetarëve për punën e policisë së shtetit.

Gjithashtu kam ndjekur me vëmendje shumicën e reagimeve të qytetarëve në rrjetet sociale.

Duke anashkaluar reagimet politike, mllefin e qytetarëve e me të drejtë, kam seleksionuar vetë disa prej tyre që për mua janë shumë shqetësuese.

Qytetarët më së shumti ankohen për sjelljen e punonjësve të Policisë, më shumë për rrugoren, patrullat, shqiponjat, policinë kufitare e atë kriminale.

Punonjës policie që sillen arrogantë me qytetarët, që nuk zbatojnë ligjin por shikojnë interesin e xhepit të tyre duke abuzuar rëndë  me detyrën dhe rrjedhimisht do kemi këtë perceptim qytetar.

Punonjës policie që nuk njohim humanizmin fare po fare, që nuk tolerojnë (brenda ligjit) qytetarët e ndershëm por tolerojnë horrat e trafikantët.

Shumë denoncime në rrjete sociale edhe për Policinë Kufitare, për marrje ryshfeti nga mjetet lundruese dhe për pasojë ndodhemi në këtë situatë sot.

Sjelle arrogante nga Patrullat e Përgjithshme dhe Shqiponjat, në shumicën e raste vetëm e vetëm për  të bërë presion e për të marrë ryshfet.

Mesazhe të ngjashme me dhjetëra qindra kanë ardhur e vijojnë të vijnë. Kjo është shumë shqetësuese shumë alarmante.

Një mesazh që s’duhet të bjerë në vesh të shurdhër:

“Sigurisht një pjese e mirë e policëve të vjetër duhen hequr fare se janë të korruptuar, ama me këta të rinjtë punoni me edukimin e tyre. Kanë problemë te pafundme me komunikimin me qytetaret, inferiore ne komunikimin edukativo njerëzor”.

Shumë i dhimbshëm për Policinë ky mesazh.

“Mjafton të kesh një dokument policie e bën ç’të duash në këtë vend”.

Zgjodha disa prej tyre që më janë drejtuar mua si Drejtor i Përgjithshëm.