Ironia/ Kim e “etur” për të luftuar korrupsionin, Ahmetaj 'flinte' nën gjirin e saj

Ironia e jetës! Dikur krahu i djathtë i kryeministrit Edi Ramës dhe “i besuari” i ish ambasadores së Shteteve të Bashkuara të Amerikës në Tiranë, Yuri Kim për të luftuar korrupsionin, ndërsa sot i kërkuar nga SPAK për tre akuza.

Ish zv.kryeministri Arben Ahmetaj ndodhet në arrati pas kërkesës së bërë nga SPAK, për ta arrestuar pasi akuzohet për veprat penale të “Korrupsionit pasiv të funksionarëve të lartë shtetërorë ose të zgjedhurve vendorë” , “Korrupsioni aktiv i funksionarëve të lartë shtetërorë ose të zgjedhurve vendorë”, “Pastrimit të produkteve të veprës penale ose veprimtarisë kriminale”.

Mirëpo ‘shkëlqimi’ i Ahmetajt kohë më parë teksa mbante dhe postin e ministrit të Rindërtimit kishte verbuar dhe ish ambasadoren Kim, e cila më 13 tetor 2021 duket se ka gjetur personine duhur në qeverinë Rama 3 për t’i besuar një mision të vështirë siç është ai i luftimit të korrupsionit.

Kim u takua Ahmetajn dhe nëpërmjet një statusi në rrjetet sociale aso kohe ajo shkruante se SHBA është serioze për çështjet e korrupsionit duke i kërkuar qeverisë të ndërmarrë hapa të vërtetë që Shqipëria të jetë më e drejtë më e fortë dhe më e pasur.

 “Takim me zv/kryeministrin Arben Ahmetaj për të theksuar dëshirën për partneritet të fortë me demokracinë, mbrojtjen dhe biznesin. Nënvizova gjithashtu se SHBA është serioze për çështjet e korrupsionit si pjesë e interesit tonë, ne i bëjmë thirrje qeverisë të ndërmarrë veprime të vërteta në mënyrë që Shqipëria të jetë më e drejtë, më e fortë dhe më e pasur.

Ne diskutuam rëndësinë e zgjidhjes së të drejtave të pronësisë, duke përfshirë dixhitalizimin e regjistrave për të kundërshtuar ndërhyrjen ilegale të njerëzve; zbatimi i reformës në drejtësi në mënyrë që qytetarët dhe investitorët të mbështeten në gjykata të pastra; trajtimin e pastrimit të parave dhe shqetësimeve të tjera të përshkruara nga FATF.

Tridhjetë vjet pas përfundimit të diktaturës komuniste, udhëheqësit nga të gjitha anët duhet të shfrytëzojnë mundësinë për të thyer zakonet e këqija të së kaluarës, për të bërë ndryshime të vështira, por të nevojshme, në mënyrë që brezi i ardhshëm të ketë një të ardhme më të mirë.

Nëse jo tani, kur? SHBA do të vazhdojë të jetë me ju në mbështetje të plotë”, ka shkruar ambasadorja Yuri Kim.

Dhe duke e konkretizuar me situatën aktuale, duket se qingji i ka fjetur nën sqetull ambasadores.

Konferenca kundër korrupsionit, Rama vendos Ahmetajn pranë Kimit

Pasditen e 13 qershorit të 2022 u mbajt në Shqipëri konferenca e parë kundër korrupsionit, ku folën kryeministri Edi Rama, ambasadorja amerikane Yuri Kim, ministri i Drejtësisë Ulsi Manja edhe disa deputetë të PS-së.

Por teksa kreu i qeverisë po fliste për luftën kundër korrupsionit, pranë kreut të diplomacisë amerikane në Shqipëri, Yuri Kim qëndronte zëvendëskryeministri Arben Ahmetaj, një nga më të akuzuarit për korrupsion nga Partia Demokratike.

Këtë fakt e ka vënë re gazetari Andi Bushati, i cili ka ironizuar në një postim në rrjetet sociale, ku shkruan “Hahahahaha...duke dëgjuar me vëmendje fjalimin e Ramës në Konferencën Kombëtare kundër Korrupsionit”.

Ajo që bie në sy është fakti se Ahmetaj dëgjon gjithë vëmendjen dhe “seriozitetin” e Ramës teksa flet për luftën kundër korrupsionit, ndërkohë që ai vetë është një nga zyrtarët më të akuzuar për korrupsion gjatë qeverisjes së Ramës.

Njeriu i tre kabineteve të qeverive socialiste

Ahmetaj është një emër i spikatur që ka arritur që të jetë pjesë e të tre kabineteve të qeverive socialiste.

Në mandatin e parë, ai shërbeu si Ministër i Zhvillimit Ekonomik, Turizmit, Tregtisë dhe Sipërmarrjes përgjatë periudhës shtator 2013- shkurt 2016. Nga shkurti i 2016 deri në janar të 2019, Ahmetajt iu besua një tjetër post me shumë rëndësi në qeveri, çelësat e financave të vendit.

Nga Dhjetori 2019 dhe në vazhdim Arben Ahmetaj mori një tjetër përgjegjësi duke drejtuar Ministrinë e Shtetit për Rindërtimin, pas një viti në drejtimin e Komisionit Parlamentar të Ekonomisë dhe Financave. Puna e bërë në procesin e rindërtimit, bëri që kryeministri Edi Rama ka vendoste në krahun e djathtë.

Ahmetaj ka qenë edhe drejtues politik i qarkut të Vlorës.

Rama e ‘zhveshi’ nga të gjitha postet në PS

Rama në shtator të 2022njoftoi se Ahmetaj nuk do të jetë më drejtuesi politik i qarkut të Vlorës dhe në vend të tij caktoi Sekretarin e Përgjithshëm Blendi Klosi, dhe kjo duket të jetë edhe ‘shuplaka’ e fundit për njeriun e tij më të afërt.

I pyetur se ku gaboi, kryeministri Edi Rama është shprehur se zëvendësimi i Arben Ahmetaj me Blendi Klosin si drejtues qarku politik i Vlorës ishte një vendim që u mor për të riorganizuar, sipas tij, skuadrën që do punojë për zgjedhjet vendore.

Në fund të korrikut të 2022, Rama njoftoi shkarkimin e tij si zv.kryeministër dhe si ministër i Shtetit për Rindërtimin, duke e zëvendësuar me Belinda Ballukun, duke ndryshuar fokusin nga ‘rindërtimi’ tek energjetika dhe infrastruktura.

Rama u pyet nga mediat edhe nëse me këtë lëvizje po paralajmëron hetim të Ahmetaj për inceneratorët.

“Këto janë ato përrallat, ju jeni në të drejtën tuaj të tregoni përralla duke përkuar pas çdo vendimi dhe hapi qëllime që nuk ekzistojnë”, tha Rama asokohe.