Ndodh në Kukës, gruas me tetë fëmijë i marrin lekët e raportit të lindjes

Emisioni “Stop” ndodhet në Kukës me zotin Fiqir Lashi, baba i tetë fëmijëve. Meqë bashkëshortja po mbushte moshën e përfitimit të një pensioni si nënë me shumë fëmijë, Fiqiri  shkon të interesohet në Sigurimet Shoqërore, ku i rezulton se i janë derdhur kontribute si bujk në emër të gruas së tij Minire Lashi dhe janë marrë pagesat e raporteve të lindjes për periudhën 2000-2010, kohë, kur kanë ardhur në jetë pesë fëmijë të familjes Lashi.

Zotëria thotë se as ka derdhur detyrime e as ka marrë para raportesh.

Në Drejtorinë Rajonale të Sigurimeve në Kukës, drejtoresha Anila Sokoli tregoi regjistrin e derdhjes së kontributeve si bujk për vitet 2001-2009 në emër të Minire Lashit, si edhe një mandat në bankë të vitit 2001.

Denoncuesi, nga ana tjetër, e mohon që gruaja e tij të dijë, sesi hyhet në bankë. Për sa i përket borderove të pagesave të raporteve të lindjes, drejtoresha e Sigurimeve Shoqërore shprehet se ato kalojnë në postë dhe kanë kaluar afatet e ruajtjes në sigurime.

 “Unë verifikova edhe kërkesën se kur është bërë, më 9 maj, kërkesën për verifikim, është kthyer përgjigje online në datën 23 maj. Në përgjigje është dhënë informacion për gjithçka se çfarë disponohet këtu, baza e të dhënave qoftë për sigurimet e derdhura, qoftë për periudhën kur është trajtuar me raport lindje. Për informacion në atë kohë pagesat përgatiteshin nga sigurimet dhe pagesat bëhen nga zyrat postare, sikurse vazhdon edhe në shumicën e rasteve sot”, tha Anila Sokoli.

Nga ana tjetër, në Postë thonë që sot borderotë kthehen në sigurime brenda 24 orëve.

Gazetarja: Drejtoresha, sot të vijnë borderotë, për të bërë pagesat e raporteve të lindjes, sa ditë i mban?

Specialistja: Të nesërmen dorëzohen te sigurimet. Te sigurimet kanë kopjet aty…

Gazetarja: 15 vjet e kishin sigurimet.

Drejtoresha, Posta Kukës: Nëse e kanë 15 vjet, aq. 2009-2024. I bie që ka kaluar, 2025, nëse është paguar 2000-2009, ne jemi në 2025, i ka kaluar afati i ruajtjes, kështu që ato mund të jenë asgjësuar.

“Stop” zhvilloi dhe një bisedë me zonjën Minire Lashi, e cila thotë se nuk ka shkuar kurrë në bankë dhe nuk ka marrë raport lindjeje për asnjërin nga fëmijët.

“Qa pune moj bijë, më ka lidh në Banka, s’kam shku asnjiherë. Unë s’di gjë. Unë vetë as lekë, as kurrnjisen, se unë s’kam marrë vesh në ato punë. Jo! Oj s’kam marrë as për të fundit, as për të parat. Nuk i di hiq!”, thotë Minire Lashi./tvklan.al