Nga titujt abuzivë tek denigrimet, si kthehen në ‘armë’ qindra portale pa adresë

Nëse shohim tituj sensacional, bombastik, në thyerje të etikës, atëherë ky lajm dhe kjo media duhet parë me dyshim.

Fatkeqësisht, ky fenomen po kthehet në normë. Këtu është vendi për të treguar për thyerjen e kufirit të lirisë së shtypit, duke e kthyer atë në armë për qëllime të errëta. Ndonjëherë, thjeshtë betejë për klikime apo vëmendje. Këto denigrime, përbëjnë sot një prej shqetësimeve më të mëdha në zhvillimin e medias së re të gjeneratës online.

Sipas Autoritetit të Komunikimeve Elektronike dhe Postare institucioni që administron domain-et me prapashtesën “.al”, rezulton se aktualisht janë të regjistruara në vendin tone 31770 domaine.

Ato kanë një gamë të gjerë funksionesh. Mes tyre janë edhe faqet e portaleve mediatike online. Në këtë shifër nuk janë të përfshira portalet apo domenet që janë me prapashtesën “.com” apo “.net”, çka tregon se shifra është shumë herë më e lartë. Ky institucion sqaroi se AKEP nuk e disponon numrin e portaleve online në tërësi pasi subjektet në fazën e regjistrimit nuk e deklarojnë aktivitetin për të cilin do të përdoret domaini. Pra, që këtu nis problemi.

‘Në Shqipëri pavarësisht se raportohet një numër 800 portale online ato që mund të quhet se funksionojnë si media pra që kanë elementë të redaksisë zbatojnë kodin e etikës dhe publikojnë lajme origjinale janë shumë pak në numër’ u shpreh Blerjana Bino.

Është shumë e vështirë të identifikohen drejtuesit apo pronarët e një portali online që ka prapashtesën “.com” apo “.net”. Teknologjia bën të mundur që domenet të regjistrohen jashtë vendit çka e bën të pamundur që autoritet shqiptare si AKEP të kenë informacione për të. Në këto kushte, kjo faqe ndonëse është hapur për të informuar mund të sulmojë, intimidojë apo publikojë lajme të pavërteta duke dezinformuar publikun.

‘Gjithë të këqijat vijnë nga ky model biznesi klikimet titujt e gënjeshtër shpifjet manipulimet përgjysmë ose të pa plota… çdo gjë lind nga nevoja për të prodhuar para që biznesi i medies të qëndrojë’ u shpreh Koloreto Cukali, Kryetar i Këshillit Shqiptar të Medias.

Titujt e portaleve për ngjarje të ndryshme janë bombastike, abuzuese dhe në pjesën më të madhe të rasteve në brendësi të tekstit nuk gjen informacionin që pretendon se ofron titulli. Në këtë garë të ethshme, nuk kursehet askush. Detajet e rasteve të abuzimeve të fëmijëve, grave apo ngjarjeve të tjera sensitive shkaktojnë tituj të pamëshirshëm, duke i goditur për herë të dytë viktimat, tashmë publikisht.

‘Kam qenë kundër rastit se si u raportua abuzimi i një fëmije në një qytet të Shqipërisë dhe ku media publikoi emrin e mamasë emrin e babait të vajzës së abuzuar, parodoksalisht nuk u raportua emri i minorenes por kjo ishte shume hipokrite’ u shpreh Anila Hoxha, gazetare.

‘Unë jam kundër kësaj gazetarie dhe etika është shumë e qartë, edhe ama duhet të ndërhyjë për raste të tilla duhet të jetë më prezente’ u shpreh Anila Hoxha, gazetare.

Kemi parë mjaft raste kur një portal sulmon një personazh publik, merret me gjithçka të tij. Jetën, aktivitetin, familjen dhe nuk kursen asgjë. Ka një rrugë që mund të ndiqet për të vendosur para përgjegjësisë ata persona që cenojnë privatësinë, duke ngritur akuzën për shpifje. Pas interesimit të Inside Story, AKEP tha se lidhur me ankesat për shpifje, intimidime, informacione të rreme etj., gjatë vitit 2025, janë depozituar vetëm 2 ankesa. Kjo shifër është e papërfillshme, thuajse inekzistente nëse krahasohet me atë çka ndodh në botën paralele, botën virtuale.

‘Rasti më i rëndomtë është që paratë vijnë nga burimet ë paditura vijnë nga politikanë të pasur nga krimi vijnë nga shteti përmes lloj-lloj shteti është blerësi më i madh nëse shteti është blerësi media i shërben shtetit blerësi mund të jetë një ministër, mund të jetë një kryetar bashkie mund të jetë një kryeministër mund të jetë një person i tretë i cili gjithashtu punon për qeverinë. kështu blihen edhe mediat ndërkombëtare’ u shpreh Koloreto Cukali, Kryetar i Këshillit Shqiptar të Medias. Top Channel