“SPAK dhe GJKKO kamzhik në duart e Ramës”, Argita Malltezi: Jamarbëri dhe Berisha nuk u pyetën në 3 vite hetim

Argita Malltezi deklaroi se as bashkëshorti dhe as i ati, zoti Sali Berisha, nuk janë pyetur gjatë 3 viteve hetime për çështjen e privatizimit të ish-kompleksit Partizani.

Për “Top Story”, Malltezi u shpreh se fakti që nuk është dëgjuar mbrojtja ose personat që janë marrë nën hetim, tregon se SPAK dhe GJKKO janë kamxhik në duart e Ramës.

Gjatë një diskutimi me gazetarin Robert Rakipllari, Malltezi tha se gjykatësja e çështjes ka marrë një dosje pa dëgjuar asnjë argument, qoftë nga mbrojtja apo qoftë nga personat nën hetim. Në kushte të tilla, Argita tha se kemi të bëjmëme shkelje të Kushtetutës.

Diskutimi:

Malltezi: Shqipëria si çdo vend në tranzicion ka pasur korrupsion, këtu bjemë dakord të gjithë. Rankimet për korrupsion të Shqipërisë megjithatë janë përkeqësuar në kohën e Ramës, është më keq sesa para 2013. Rankimet e DASH flasin për korrupsionin, por këtu drejtësia godet nga bishti.

Rakipllari: Zv. kryeministri nuk është bishti, ministri i Mjedisit, ministri i Brendshëm…

Malltezi: Ministri i Brendshëm shkoi në procedim pasi u zbulua se ishte i lidhur me mafien italiane.

Rakipllari: Hetimi nuk fillon nga bishti. Nuk ka hetim sot. Kjo është fashitje në shtetin ligjor.

Rakipllari: SPAK-u ka goditur deri tani nga ana e majtë.

Malltezi: Jo jo, janë proceduar edhe më parë kryeministra. Aa për pritshmëritë e SPAK-ut shikohet materja dhe përmbajtja. Por po them diçka, bënë 3 vjet hetime. Po në cilin dimension dhe në cilin planet mund të ndodhë që në 3 vite të pyeten bashkëortakë të Jamarbërit, personat pjesë e administratës, të mos lihet asnjë pa pyetur gjatë hetimeve përveç dy personave që janë objekti kryesor i hetimeve, Jamarbër Malltezi dhe Sali Berisha.

Si mund të shkojë dosja në gjykatë pa pyetur Malltezin dhe Berishën. Sepse kur të dilte dosja, nuk duhej të mos bëhej publike deklarata e tyre. S’kanë dashur që deklarimi i Berishës dhe Malltezit të jetë në dosje dhe të dalë në media. Pse? Sepse ky është një sulm politik i hartuar nga Edi Rama dhe SPAK dhe GJKKO janë kamzhik në duart e Edi Ramës.

Kjo gjykatëse ka marrë një dosje dhe ka vendosur masën e kufizimit të lirisë pa dëgjuar asnjë argument të mbrojtjes dhe personave. Ndoshta këta ishin gabim por duhet të ishin dëgjuar. Është hera e parë në 30 vjet që shkelet kushtetuta dhe kufizohet liria e një deputeti.