Të ardhurat nga emigracioni këtë vit po shënojnë rekord historik

Të ardhurat e shqiptarëve nga puna jashtë vendit këtë vit kanë arritur vlerat më të larta historike.

Të ardhurat nga ky zë në bilancin e pagesave për gjysmën e parë të këtij viti kishin vlerën e 298 milionë eurove, në rritje me 18% krahasuar me të njëjtën periudhë të vitit të kaluar.

Me këtë shifër, të ardhurat nga puna dhanë një kontribut të rëndësishëm në prurjet valutore në ekonomi dhe në ngushtimin e deficitit të llogarisë korrente.

Në terma neto (duke zbritur të ardhurat e jorezidentëve nga puna në Shqipëri), të ardhurat nga puna kishin vlerën e 278 milionë eurove, me një rritje edhe më të madhe, prej 20% krahasuar me gjysmën e parë të vitit të kaluar.

Sipas metodikës së Bilancit të Pagesave, të ardhura nga puna jashtë vendit klasifikohen kompensimi i punonjësve, që përfshin pagën, shpërblimet dhe përfitime të tjera, të fituara nga individët jorezidentë në një ekonomi, për punën e kryer për rezidentët e kësaj ekonomie.

Në këtë kategori punonjësish, përfshihen punonjësit sezonalë apo ata që punësohen për një periudhë afatshkurtër, më pak se një vit, si dhe punëtorët kufitarë të cilët e kanë qendrën e interesit të tyre ekonomik në vendin e tyre të origjinës.

Në analizat e flukseve hyrëse nga jashtë, shpesh të ardhurat nga puna jashtë vendit i bashkëngjiten dërgesave të emigrantëve dhe klasifikohen si pjesë e të ardhurave totale nga remitancat në ekonomi.

Për 6-mujorin 2024, dërgesat e emigrantëve kishin vlerën e 510 milionë eurove, në rritje me 15% krahasuar me të njëjtën periudhë të vitit të kaluar.

Po të mbledhin remitancat dhe të ardhurat nga puna, kontributi i tyre total në ekonominë shqiptare arriti në 808 milionë euro për gjashtë muaj, shifër kjo 16% më e lartë krahasuar me gjysmën e parë të vitit të kaluar.

Të ardhurat nga puna dhe remitancat së bashku mbulonin rreth 31% të deficitit tregtar në mallra për gjysmën e parë të këtij viti.

Në këto 30 vite, puna ka qenë faktori dominues ku janë mbështetur aftësitë eksportuese të ekonomisë shqiptare. Përveç të ardhurave direkte nga puna jashtë, një kontribut të rëndësishëm ka dhënë historikisht jep edhe regjimi i përpunimit aktiv të mallrave (fasoneria).

Për 6-mujorin, ato arritën në 358 milionë euro, 9% më pak krahasuar me të njëjtën periudhë të një viti më parë. Fasoneria në dy vitet e fundit ka marrë një goditje të rëndë nga forcimi i lekut në kursin e këmbimit valutor, por megjithatë vazhdon të jetë një burim i rëndësishëm të ardhurash për balancimin e deficitit të jashtëm të ekonomisë./ MONITOR