Flash News

Zbardhet vendimi i plotë i Kushtetueses mbi çështjen e Veliajt

Festimet për kualifikimin e Meksikës në Botëror kthehen në tragjedi, tre tifozë humbin jetën

SPAK kërkoi burg, GJKKO shpall të pafajshme Majlinda Bufin

Aksidenti në autostradën Durrës-Tiranë, 5 të plagosur dalin nga spitali, si paraqitet gjendja e të tjerëve

Posta e mëngjesit/ Me 2 rreshta: Çfarë pati rëndësi dje në Shqipëri

E-TJERA

Zbardhet vendimi i plotë i Kushtetueses mbi çështjen e Veliajt

Politiko 1 Korrik 2026, 18:42

Zbardhet vendimi i plotë i Kushtetueses mbi çështjen e Veliajt

Gjykata Kushtetuese ka publikuar arsyetimin e vendimit të marrë më 25 maj, me të cilin, me pesë vota pro dhe tre kundër, urdhëroi Gjykatën e Lartë të rishqyrtojë kërkesën e kryebashkiakut të arrestuar të Tiranës, Erion Veliaj, për zëvendësimin e masës së sigurisë.

Në argumentimin e saj, Kushtetuesja vlerëson se Gjykata e Lartë nuk ka dhënë një analizë të plotë mbi domosdoshmërinë e masës "arrest në burg", duke mos sqaruar pse nuk mund të aplikoheshin masa më të lehta sigurie.

Sipas vendimit, në këtë vlerësim duhej të merrej parasysh edhe fakti se Veliaj mban funksionin e kryetarit të Bashkisë së Tiranës.

Gjykata thekson se nuk është analizuar në mënyrë të mjaftueshme ndikimi që masa e arrestit ka mbi të drejtën për t’u zgjedhur, të garantuar nga neni 45 i Kushtetutës. Po ashtu, sipas Kushtetueses, Gjykata e Lartë nuk ka ushtruar një kontroll efektiv për të vlerësuar nëse masa alternative, si garancia pasurore apo masa të tjera më pak kufizuese, do të ishin të mjaftueshme për të shmangur rreziqet procedurale pa penguar ushtrimin e funksionit publik.

Një tjetër element i evidentuar në vendim lidhet me mënyrën se si Veliaj është mbajtur gjatë seancave gjyqësore. Kushtetuesja vëren se Gjykata e Lartë nuk ka arsyetuar pretendimin se qëndrimi i tij në kabinën e xhamit mund të krijonte perceptimin e një personi të rrezikshëm, duke cenuar kështu parimin e prezumimit të pafajësisë.

Ndërkohë, ndaj Erion Veliajt SPAK ka mbyllur hetimet dhe ka dërguar dosjen për gjykim në Gjykatën e Posaçme. Prokuroria e Posaçme i atribuon atij 13 akuza, ndërsa bashkëshortja e tij, Ajola Xoxa, përballet me 12 akuza.

Sipas SPAK, Veliaj dhe Xoxa dyshohet se kanë përfituar në nëntë episode të ndryshme para, pasuri të paluajtshme dhe përfitime të tjera të paligjshme nga kompani dhe organizata jofitimprurëse, të cilat më pas kanë marrë fonde publike ose leje ndërtimi nga Bashkia e Tiranës.

Hetimet pretendojnë se, në cilësinë e kryebashkiakut, Veliaj ka miratuar me firmën e tij shpërndarjen e fondeve publike, të cilat përfundonin te organizata të lidhura me bashkëshorten e tij ose persona të afërt me të. Sipas dosjes hetimore, çifti ka përfituar gjithashtu prona me vlerë të konsiderueshme nga subjekte që kishin përfituar kontrata publike dhe leje ndërtimi nga Bashkia e Tiranës.

Kliko këtu për vendimin e plotë.

Të fundit