Hipokrizia e Damian Gjiknurit dhe socialistëve, sot kallëzojnë ish-drejtorin e LSI, kur ishte pjesë e ‘tepsisë’ i dhanë 35 mln dollarë ndonëse kishin kërkesën për shkarkim

Ministri i Transporteve, Damian Gjiknuri ka kallëzuar sot penalisht ish-drejtorin e Autoritetit Rrugor Shqiptar, Dashamir Xhika, për shkak se me veprimet dhe mosveprimet i ka shkaktuar shtetit mbi 70 milionë dollarë dëme në rrugën Tiranë-Elbasan. Xhika ishte emëruar në këtë detyrë si propozim i LSI-së dhe ka dhënë dorëheqjen më 18 shtator të këtij viti, pas kalimit të infrastrukturës në drejtimin e Gjiknurit.

Por rasti i sotëm nuk është i pari kur faktohet se nën drejtimin e Dashamir Xhikës, ARRSH i ka shkaktuar dëme të konsiderueshme buxhetit të shtetit. Në shkurt të 2016-ës, kur LSI ishte ende pjesë e “tepsisë”, Kontrolli i Lartë i Shtetit dorëzoi në Prokurori kallëzim penal ndaj Xhikës pasi rezultonte se kishte shkaktuar një dëm prej 4.5 milionë euro në zgjerimin e autostradës Tiranë-Durrës dhe në ndërtimin e ‘By pass’-it Plepa-Kavajë-Rrogozhinë.

Përveç të tjerave, KLSH kërkoi edhe nisjen e procedurave për shkarkimin nga detyra të Xhikës si kryetar i ARRSH-së.

Në atë periudhë, Ministria e Infrastrukturës drejtohej nga Edmond Haxhinasto, ministër i LSI-së, dhe sigurisht që ndaj Xhikës nuk u mor asnjë masë.

Megjithatë, kur kishte kaluar më shumë se një vit nga denoncimi i KLSH-së në Prokurori dhe kërkesa për shkarkim, më 11 prill të 2017-ës, Dashamir Xhika jo vetëm që qëndronte i pashqetësuar në detyrë, por deputetët e Partisë Socialiste në komisionin e Ligjeve që drejtohej nga Vasilika Hysi dhe qeveria e kryeministrit Edi Rama, “e shpërblyen” me 35 milionë dollarë të tjera për rrugën Tiranë-Elbasan. I vetmi që ngriti shqetësimin për koston e lartë të kësaj autostrade ishte deputeti Pandeli Majko, aktualisht ministër i Diasporës.

Sot, ministri i të njëjtës qeveri, Damian Gjiknuri, ka zbuluar se Dashamir Xhika në rrugën që pak muaj më parë mori 35 milionë dollarë, ka shkaktuar një dëm mbi 70 milionë dollarë. Por a mund të shmangej ky dëm kolosal për shqiptarët nëse Edi Rama do të kishte zbatuar kërkesën e KLSH-së në shkurt të 2016-ës për shkarkimin e Dashamir Xhikës?

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm