Kina nuk do të lejojë luftanijet dhe avionët amerikanë që të ndalojnë në Hong Kong, pas vendimit të Uashingtonit për të mbështetur protestat demokratike në vend. Ministria e Punëve të Jashtme njoftoi sot se ka marrë këtë vendim, si përgjigje e sjelljes së paarsyeshme të palës amerikane.
“Si përgjigje ndaj sjelljeve pa arsye të palës amerikane, qeveria kineze vendos që të pezullojë shqyrtimin e kërkesave nga anijet ushtarake dhe avionët amerikanë për të vizituar Hong Kongun, që nga dita e sotme”, tha zëdhënësja e institucionit, gjatë një konferencë në Pekin.
Ajo shtoi se qeveria kineze do të vendosë sanksione ndaj organizatave të ndryshme jo-qeveritare të të drejtave të njeriut në vend, që kanë monitoruar dhe raportuar për protestat në Hong Kong.
Presidenti i SHBA-së javën e shkuar firmosi Aktin e Demokracisë dhe të të Drejtave të Njeriut të Hong Kongut, pasi ai u miratua në të dyja dhomat e Kongresit amerikan, me thuajse aprovim unanim dypartiak.
Financuar Nga Bashkimi Europian
