Flash News

Kërcet arma në Durrës, plagoset një 30-vjeçar

Aksident në Rrugën e Arbrit, makina del nga rruga, dy të plagosur

Arrestimet te “Bankers Petrolium”, Prokuroria jep detaje: Deklaroi 11.7 mld lekë humbje, shteti nuk përfitoi asnjë të ardhur për 20 vite

Vdesin tragjikisht në aksident ylli i Liverpool, Diogo Jota dhe vëllai i tij

Posta e mëngjesit/ Me 2 rreshta: Çfarë pati rëndësi dje në Shqipëri

Rajoni

Nismë në Shkup për t'i hequr votëbesimin Kryetarit të Parlamentit, Afrim Gashi

Politiko 3 Shtator 2024, 19:28

Nismë në Shkup për t'i hequr votëbesimin Kryetarit

Parlamaneti i Maqedonisë së Veriut e hapi sot debatin për interpelancën ndaj Kryetarit të Parlamentit, zotit Afrim Gashi, me kërkesë të partisë maqedonase 'E Majta', e cila e akuzon atë për shkeljen e rregullores së punës së kuvendit dhe për nxitjen e disa skandaleve. Partitë shqiptare e shikojnë nismën për interpelancë (mocion mosbesimi) si të motivuar mbi baza etnike. Shumica e ligjvënësve nuk e mbështesin këtë nismë.

Nisma e partisë nacionaliste maqedonase 'E Majta' për t'i hequr votëbesimin Kryetarit të Parlamentit, Afrim Gashi duket se nuk do të rezultojë me largimin nga posti të kreut të institucionit ligjvënës, për shkak se për këtë nuk ka vota të mjaftueshme. Partitë e pushtetit dhe koalicioni Fronti Evropian i opozitës nuk e mbështesin interpelancën.

Partia "E Majta" e akuzon zotin Gashi për shkeljen e rregullores së parlamentit dhe për një sërë skandalesh, sipas saj. Dimitar Apasiev i partisë 'E Majta' thotë se kryetari i parlamentit nuk e respekton gjuhën dhe flamurin maqedonas; se ka shkelur parimin sekular të shtetit duke organizuar një lutje fetare në parlament; se ka ndërhyrë kundër ligjeve në rastin e kontrollit në aeroportin e Shkupit të Presidentes së Kosovës, Vjosa Osmani dhe ka keqpërdorur shërbimet zyrtare dhe policore me pjesëmarrjen e tij në një dasmë në Kosovë.

Ndërkohë, kryetari i parlamentit nismën për mocionin kundër tij e sheh si përpjekje për thellimin e ndarjeve në shoqëri, për heqjen dorë nga rruga e vendit drejt Bashkimit Evropian dhe nga anëtarësimi në NATO. Zoti Gashi akuzoi partinë 'E Majta' për qëndrimet, siç tha, “albanofobe dhe islamofobe”.

”Ne të gjithë flasim me zë të lartë për BE-në; qytetarët flasin për bashkëjetësën. Të gjithë themi se jemi këtu bashkë në të mirë dhe në të keqe, ndërsa vetëm kjo parti (E Majta) flet kundër tri shtyllave themelore të shoqërisë sonë: orientimin tonë euro-atlantik, përkushtimin tonë për marrëdhënie të mira fqinjësore dhe përkushtimin tonë për harmoni ndëretnike. Është shumë keq kur luan në kartën e nacionalizmit të gjykimit të tjetrit pa i dëgjuar të gjitha faktet dhe argumentet”, tha zoti Gashi.

Lidhja Social Demokrate e opozitës e mbështetë interpelancën ndaj zotit Gashi, duke e akuzuar atë për rastin në aeroportin e Shkupit dhe udhëtimin me veturë zyrtare në një dasmë në Kosovë, me ç’rast e gjithë kolona e krushqëve kishte kaluar kufirin Maqedoni – Kosovë pa iu nënshtruar kontrollit të dokumenteve personale në pikën kufitare të Bllacës.

Fronti Evropian i drejtuar nga Bashkimi Demokratik për Integrim është kundër interpelancës.

“Për faktin që... konstatojmë dhe jemi të mendimit se motivi për këtë interpelancë nuk ka të bëjë me punën e kryetarit të parlamentit, por ka të bëjë me përkatësinë e tij etnike”, tha Talat Xhaferi, deputet i BDI-së.

Por, zoti Xhaferi theksoi se Fronti Evropian ka vërejtje për punën e kryetarit të parlamentit për shkak të mosrespektimit të vazhdueshëm, sipas tij, të procedurave të vendosura me rregulloren e punës së parlamentit.

Kryeministri dhe kryetari i partisë VMRO-DPMNE, Hristijan Mickovski e ka quajtur “sjellje të papjekur dhe të krisur” të Lidhjes Social Demokrate, BDI-së dhe të Majtës duke shtuar se nuk ka asnjë bazë për interpelancë ndaj kryetarit te parlamentit, Afrim Gashi.

Partia 'E Majta' ka gjashtë deputetë në parlament dhe së bashku me 18 deputetët e Lidhjes Social Demokrate nuk e arrin numrin e duhur prej 61 ligjvënësve për ta rrëzuar nga posti kryetarin e Parlamentit. VOA