Marsel Lela
‘Tersi i Pojanit’ është një legjendë që tregohet në Pojan të Fierit për një person që gjatë jetës së tij i solli ters gjithë fshatit. Para se të vdiste la amanet që t’i varnin një litar në qafë dhe pjesën tjetër të litarit t’ia linin jashtë varrit.
Meqë ishte amaneti i tij i fundit fshatarët bënë siç u tha. Pas ca kohësh, disa xhandarë që po kalonin pranë varrezave panë një litar që dilte nga varri. Urdhëruan që trupi të zhvarrosej menjëherë dhe kur panë një njeri me një litar rreth qafës, dyshuan se e kishin vrarë. Kështu, mblodhën gjithë fshatin dhe nisën t’i hetonin një nga një. Atëhere fshatarët e kuptuan se tersi nuk kishte mbaruar me vdekjen e bashkëfshatarit të tyre.
Ishin fjalët e Klement Zgurit, kreut të KQZ-së, ato që ma sollën ndëmend këtë legjendë sot, pas vendimit final për zyrtarizmin e zgjedhjeve vendore të 30 qershorit.
Zguri u shpreh se ‘këto zgjedhje u shoqëruan nga një konflikt i madh politik që do të vazhdojë gjatë’. Pra, konfliktet dhe mosmarrëveshjet politike mes palëve, figura e keqe në sytë e ndërkombëtarëve që përkthehet në bllokim të negociatave për antarsim të Shqipërisë në Bashkimin Europina, nuk reshtën me një firmë të Komisionit Qendror të Zgjedhjeve që u rrek të legalizonte një palë zgjedhje, që edhe vetë anëtarët e tij e pranuan se ishin të njëanshme.
Por Klement Zguri, pa dashje bëri kasandrën e një të keqje shumë herë më të madhe se vazhdimësia e konfliktit politik.
Zgjedhjet e 30 qershorit nuk janë vetëm cenim i demokracisë dhe mungesës së alternativave. Më shumë se çdo gjë tjetër ato janë vrasje e standardeve të zgjedhjeve të ardhshme.
Çfarëdo që të ndodhë në ato zgjedhje nuk mund të jetë më keq se kaq. Sado të manipuluara, të vjedhura dhe pa standarde qofshin, nuk mund të jenë kurrë në nivelin e absurdit dhe paligjshmërisë së vendoreve të 30 qershorit.
Do të jetë shumë e thjeshtë për OSBE/ODIHR-in që në zgjedhjet e ardhshme të thotë se, ‘ishte një proces me probleme, por gjithsesi më i mirë dhe me standarde më të larta se zgjedhjet e kaluara’.
Cilado parti që do t’i fitojë ato zgjedhje, lajmi i mirë për to është se standardet i kanë në ‘xhep’.
Lajmi i keq për shqiptarët është se ‘litarin’ e zgjedhjeve të 30 qershorit do vazhdojnë ta kenë nëpër këmbë si pengesë në turravrapin drejt së ardhmes.
Financuar Nga Bashkimi Europian
